Пазбаўлены або абмежаваны ў волі не менш як 158 работнікаў культуры — Беларускі ПЭН

10 траўня, Позірк. За студзень — сакавік у Беларусі зафіксавана як мінімум 316 парушэнняў правоў дзеячаў культуры. Такія звесткі прыводзяцца ў маніторынгу парушэнняў культурных правоў і правоў чалавека, які падрыхтаваў Беларускі ПЭН.

Да крымінальнай адказнасці за першыя тры месяцы 2024 года прыцягнута не менш як 14 дзеячаў культуры, з іх пяць асуджана на тэрміны ад 2,5 да пяці гадоў пазбаўлення волі.

Арганізацыя зафіксавала 135 парушэнняў у дачыненні да 33 арганізацый і супольнасцяў; 57 — у адносінах да аб’ектаў гісторыка-культурнай спадчыны і беларускай мовы; 87 старонак дзеячаў культуры ў сацыяльных сетках, кнігі, сайты і іншыя матэрыялы на культурную тэматыку ўнесены ў Рэспубліканскі спіс экстрэмісцкіх матэрыялаў.

Пазбаўленне права на справядлівы суд — асноўны від парушэнняў у адносінах да работнікаў культуры (61 выпадак). ПЭН зафіксаваў 18 фактаў стварэння адміністрацыйных перашкод для дзейнасці. У тым ліку ліквідавана 8 некамерцыйных арганізацый, якія маюць дачыненне да сферы культуры.

У “Пераліку арганізацый і фізічных асоб, якія маюць дачыненне да тэрарыстычнай дзейнасці” — 29 дзеячаў культуры, у “Пераліку грамадзян Рэспублікі Беларусь, замежных грамадзян і асоб без грамадзянства, якія маюць дачыненне да экстрэмісцкай дзейнасці” — 198. Не менш за 8 работнікаў культуры прызнаны ўдзельнікамі “экстрэмісцкіх фарміраванняў ”.

Усяго ў Беларусі пазбаўлены або абмежаваны ў волі не менш як 158 работнікаў культуры, гаворыцца ў справаздачы.

Дзяржаўная палітыка ў галіне культуры — “гэта жорсткі кантроль усіх удзельнікаў культурнага працэсу, устараненне са сферы нелаяльных палітычнаму рэжыму спецыялістаў, імпартазамяшчэнне, актыўнае прытрымліванне прарасійскаму вектару развіцця, пераслед за выкарыстанне нацыянальных беларускіх і ўкраінскіх сімвалаў”, адзначае ПЭН.

“Культура для дзяржавы — інструмент ідэалогіі, а паспяховасць развіцця сферы ацэньваецца статыстыкай праведзеных мерапрыемстваў”, — гаворыцца ў рэлізе.

29 сакавіка на пашыраным пасяджэнні прэзідыума Савета Рэспублікі міністр культуры Анатоль Маркевіч заявіў, што шэрагі творчай інтэлігенцыі “ачышчаюцца ад асоб, якія падрывалі асновы дзяржавы”.