Еўразійскі эканамічны саюз мае перспектывы пашырэння, лічыць кіраўнік Суда ЕАЭС

29 траўня, Позірк. Пашырэння Еўразійскага эканамічнага саюза (ЕАЭС) не выключыў 29 траўня ў Мінску старшыня Суда ЕАЭС Аляксей Дронаў.

“Можа быць, будуць і іншыя дзяржавы, якія захочуць удзельнічаць у Саюзнай дзяржаве, але, наколькі я ведаю, пакуль гэтае пытанне ў практычнай плоскасці не стаіць, — цытуе яго ТАСС. — А вось ЕАЭС, мне падаецца, мае вельмі сур’ёзныя перспектывы для далейшага развіцця, інстытуцыйнага развіцця, і я не выключаю пашырэння кола дзяржаў-удзельніц”.

Паводле яго слоў, падпісанне 10 гадоў таму дагавора аб ЕАЭС “азнаменавала пераход да новага этапу развіцця еўразійскай інтэграцыі”. Пры гэтым сам дакумент увабраў у сябе тыя “шматлікія напрацоўкі”, што “былі дасягнутыя на папярэдніх этапах”.

Дронаў падкрэсліў, што сам дагавор за гэтыя гады “зведаў шэраг змяненняў”, і ён “будзе развівацца і далей у адпаведнасці з патрабаваннямі часу”.

“Саюзная дзяржава цэментуе ядро еўразійскай інтэграцыі, — лічыць старшыня суда. — Натуральна, дзейнасць ЕАЭС знаходзіцца ў поле зроку органаў СД. Многія з мэт і задач СД і ЕАЭС практычна ідэнтычныя, перасякаюцца”.

Дзень ЕАЭС заснаваны распараджэннем Вышэйшага Еўразійскага эканамічнага савета 27 траўня 2022 года і адзначаецца штогод 29 траўня. У гэты дзень у 2014 годзе кіраўнікі Беларусі, Казахстана і Расіі падпісалі Дагавор аб ЕАЭС, які набыў моц 1 студзеня 2015 года.

Аляксандр Лукашэнка, віншуючы з гэтай нагоды 29 траўня прэм’ер-міністра Арменіі Нікола Пашыняна, прэзідэнтаў Касым-Жамарта Такаева (Казахстан), Садыра Жапарава (Кыргызстана) і Уладзіміра Пуціна (РФ), адзначыў, што за 10 гадоў свайго існавання ЕАЭС “пераканаўча даказаў запатрабаванасць”.

ЕАЭС — арганізацыя рэгіянальнай эканамічнай інтэграцыі, якая мае міжнародную правасуб’ектнасць. Яе паўнапраўнымі членамі з’яўляюцца Беларусь, Казахстан і Расія (з 1 студзеня 2015 года), а таксама Арменія (з 2 студзеня 2015 года) і Кыргызстан (з 12 жніўня 2015 года).

Краіны-назіральніцы — Куба, Малдова, Узбекістан. Пагадненне аб зоне свабоднага гандлю з ЕАЭС падпісалі В’етнам, Сербія і Сінгапур.