У Мінску за “тэрарызм” судзяць замежніка, яму пагражае пакаранне аж да смяротнага

6 чэрвеня, Позірк. У Мінскім абласным судзе 6 чэрвеня пачаўся разгляд крымінальнай справы ў дачыненні да Рыка Крыегера, вынікае з раскладу на партале электроннага судаводства.

Згодна з інфармацыяй праваабаронцаў, мужчына, хутчэй за ўсё, з’яўляецца грамадзянінам Германіі. “Радыё Свабода” паведамляе, што амбасада ФРГ у Беларусі ўскосна гэта пацвердзіла.

Крыегер абвінавачваецца паводле ч. 4 арт. 295 (незаконныя дзеянні ў адносінах да агнястрэльнай зброі, боепрыпасаў і выбуховых рэчываў), ч. 4 арт. 309 (наўмыснае прывядзенне ў непрыдатнасць транспартнага сродку або шляхоў зносін), ч. 3 арт. 361¹ (стварэнне экстрэмісцкага фарміравання або ўдзел у ім), ч. 3 арт. 289 (акт тэрарызму), арт. 358¹ (агентурная дзейнасць) і арт. 133 (наёмніцтва) Крымінальнага кодэкса.

Праваабаронцы заявілі, што гэта першы вядомы ім у Беларусі працэс за “наёмніцтва”, аднак сутнасць абвінавачанняў невядомая.

Варта адзначыць, што ч. 3 арт. 289 КК звязаная з дзеяннямі, “здзейсненымі арганізаванай групай, або з прымяненнем аб’ектаў выкарыстання атамнай энергіі, або з выкарыстаннем радыеактыўных рэчываў або ядзерных матэрыялаў, моцнадзейных, таксічных хімічных або біялагічных рэчываў або спалучаныя з забойствам чалавека”. Санкцыя паводле яе — пазбаўленне волі на тэрмін ад 10 да 25 гадоў са штрафам або без штрафу, пажыццёвае пазбаўленне волі або смяротнае пакаранне.