Лукашэнка жадае дапамагчы Кітаю з глабальнай бяспекай і развіццём цывілізацыі

15 чэрвеня, Позірк. Мінск імкнецца да “шчыльнай супрацы па ажыццяўленні ініцыятыў Пекіна ў галіне глабальнай бяспекі, развіцця цывілізацыі” і іншых сферах, заявіў Аляксандр Лукашэнка, віншуючы 15 чэрвеня старшыню КНР Сі Цзіньпіна з 71-годдзем.

“У Беларусі з захапленнем назіраюць за поспехамі Кітая як ва ўнутранай палітыцы, так і на міжнароднай арэне, — прыводзіць тэкст паслання прэс-служба віншавальніка. — Без сумневу, яны сталі магчымыя дзякуючы вашаму эфектыўнаму кіраўніцтву, паслядоўнай рэалізацыі вашых ідэй, скіраваных на пабудову супольнасці адзінага лёсу чалавецтва”.

Лукашэнка падзякаваў кітайскаму кіраўніку за “асабістую ўвагу і намаганні, накіраваныя на сталае ўмацаванне стасункаў усепагоднага і ўсебаковага стратэгічнага партнёрства” паміж дзвюма краінамі, асабліва за падтрымку і дапамогу Беларусі на шляху далучэння да Шанхайскай арганізацыі супрацоўніцтва (ШАС) і БРІКС+. На саміце ШАС 4 ліпеня ў Астане (Казахстан) ён спадзяецца сустрэцца са старшынёй КНР.

Адметна, што пра ініцыятывы глабальнай бяспекі Лукашэнка, які дапамагае Расіі ў развязанай ёю вайне супраць Украіны, кажа Сі Цзіньпіну, які можа пайсці на падпарадкаванне Тайваня ваенным шляхам.

Летась Лукашэнка двойчы наведваў Кітай і сустракаўся з кіраўніком КНР. Першы візіт адбыўся 28 лютага — 2 сакавіка, другі — 3–4 снежня. Абодва разы абмяркоўваўся шырокі спектр пытанняў, у тым ліку звязаных з эканомікай, міжнароднымі стасункамі.

Сёлета напрыканцы траўня Пекін наведвала беларуская дэлегацыя на чале са старшынёй Савета Рэспублікі Наталляй Качанавай — для “ўмацавання палітычнага ўзаемадаверу і практычнай супрацы”.