Лукашэнка зноў запрасіў прэзідэнта Мазамбіка ў Беларусь
Філіпе Жасінту Ньюсі
25 чэрвеня, Позірк. Беларусь зацікаўленая ў пашырэнні кантактаў з Мазамбікам “на найвышэйшым і высокім узроўнях”, адзначыў Аляксандр Лукашэнка, віншуючы 25 чэрвеня прэзідэнта гэтай краіны Філіпе Жасінту Ньюсі з Днём незалежнасці.
Мінск, гаворыцца ў апублікаваным прэс-службай віншавальніка пасланні, “з задавальненнем” назірае за поспехамі Мапуту ў сацыяльна-эканамічным развіцці. Развіццё Мазамбіка, на думку Лукашэнкі, дае магчымасць для “больш актыўнай супрацы з Беларуссю ў сферах гандлю, навукова-прамысловай кааперацыі, механізацыі сельскай гаспадаркі, гарантавання харчовай бяспекі, адукацыі, лагістыкі ды іншых”.
Ён пацвердзіў накіраванае год таму Ньюсі запрашэнне наведаць Мінск, каб “прадметна абмеркаваць перспектывы двухбаковага ўзаемадзеяння з фокусам на выпрацоўку практыка-арыентаваных праектаў на карысць як народу Мазамбіка, так і жыхарам іншых краін Паўднёва-Афрыканскага рэгіёну”.
Дыпламатычныя стасункі паміж краінамі былі ўсталяваныя 29 лютага 2000 года.
Тавараабарот нязначны. Паводле інфармацыі МЗС, аб’ём узаемнага гандлю ў 2021 годзе склаў 1,523 млн долараў (беларускі экспарт — 1,18 млн, мазамбікскія пастаўкі — 0,343 млн), 2020-м — 159 тыс. (толькі беларускі экспарт). Актуальных даных у адкрытым доступе няма.
У Мазамбіку пражывае каля 34 млн чалавек. Валавы ўнутраны прадукт на душу насельніцтва ў 2022 годзе быў амаль у 14 разоў меншы, чым у Беларусі — 581 долар супраць 7.888.
Мазамбікскі экспарт у 2023 годзе склаў амаль 10,1 млрд долараў, імпарт — 8,3 млрд.
Найбольш прадаванымі на знешні рынак таварамі былі каменны вугаль (21% усяго аб’ёму экспарту; 1,76 млрд долараў), газы нафтавыя і вуглевадароды (20%; 1,72 млрд), газы нафтавыя і вуглевадароды газападобныя (13,2%; 1,09 млрд), неапрацаваны алюміній (7,95%; 658 млн), электраэнергія (5,61%; 464 млн).
Мазамбікскую прадукцыю ў асноўным спажывалі Індыя (доля — 15,6%; 1,29 млрд), Кітай (14,2%; 1,17 млрд), ПАР (13,9%; 1,15 млрд), Паўднёвая Карэя (5,63%; 466 млн), Вялікабрытанія (4,83%; 399 млн).
Галоўнымі імпартнымі таварамі сталі: нафта і нафтапрадукты (21%; 2,15 млрд), рэактары ядзерныя, катлы, абсталяванне і механічныя прылады (11,3%; 1,14 млрд), наземны транспарт, акрамя чыгуначнага ці трамвайнага (7,33%; 740 млн), злакі (6,85%; 692 млн), электрамашыны і абсталяванне, гуказапісваючая і гукаўзнаўляльная апаратура, апаратура для запісу і прайгравання тэлевізійнага малюнка і гуку, іх часткі і прыналежнасці (6,44%; 650 млн).
Амаль чварціна імпартаваных тавараў была з ПАР (23%; 2,33 млрд). Сярод найбуйнейшых пастаўшчыкоў таксама Кітай (15,3%; 1,55 млрд), ААЭ (10,3%; 1,04 млрд), Індыя (7,99%; 807 млн) і Сінгапур (6,11%; 616 млн).
Мінэканомікі: Беларусь у Афрыцы мяняе трактары на апельсіны
18 красавіка, Позірк. Беларусь працягвае нарошчваць сваю прысутнасць на рынках дружалюбных краін, выбудоўваючы "новыя гандлёва-эканамічныя сувязі", заявіў першы намеснік міністра эканомікі Андрэй Картун 17 красавіка ў эфіры тэлеканала "Беларусь 1". Паводле яго слоў, "апорнымі пунктамі" ў Афрыцы з'яўляюцца Егіпет, Нігерыя, …