ВПК Беларусі працуе з “максімальнай аддачай” — Мінабароны

8 ліпеня, Позірк. Прадпрыемствы беларускага ваенна-прамысловага комплексу працуюць з “максімальнай аддачай”, і “ўжо ў бліжэйшы час” на ўзбраенне арміі паступяць зенітныя ракетныя комплексы “Бук-МБ”, заявіў начальнік упраўлення зенітных ракетных войскаў камандавання ВПС і войскаў СПА Узброеных сіл Андрэй Севярынчык.

Яго каментар з нагоды Дня зенітных ракетных войскаў, які адзначаецца 8 ліпеня, апублікавала прэс-служба Міністэрства абароны.

Паводле яго слоў, цяпер беларускія вайскоўцы маюць на ўзбраенні расійскія ЗРК С-300, С-400, “Тор-М2”, “Бук”. “На дадзены момант яны з’яўляюцца аднымі з самых дасканалых у пытаннях знішчэння паветранага праціўніка на любых вышынях”, — сказаў Севярынчык.

“Падрыхтоўка асабістага складу зенітных ракетных войскаў ажыццяўляецца як на тэрыторыі Рэспублікі Беларусь, так і на тэрыторыі Расійскай Федэрацыі”, — дадаў ён.

“Баявыя пускі”, удакладніў Севярынчык, беларускія вайскоўцы ажыццяўляюць на расійскіх палігонах Ашулук і Капусцін Яр у Астраханскай вобласці і палігоне Тэлемба ў Бураціі.

“Сучасны вопыт вядзення баявых дзеянняў у паветранай прасторы накладвае істотны адбітак на развіццё нашых войскаў. Комплексы забяспечваюцца супрацьдроннымі сістэмамі. Ідзе пастаяннае ўзаемадзеянне з падраздзяленнямі радыёэлектроннай барацьбы і пастаноўка на ўзбраенне новых сродкаў радыёэлектроннай барацьбы, што забяспечвае непасрэднае прыкрыццё як комплексаў, так і аб’ектаў, якія прыкрываюцца ЗРВ, ад уздзеяння беспілотных лятальных апаратаў”, — сказаў Севярынчык.

Беларускі варыянт расійскага комплексу “Бук” — “Бук-МБ” — быў прадстаўлены ў 2005 годзе.

“Роля і значэнне” супрацьпаветранай абароны пастаянна ўзрастаюць, заявіў Аляксандр Лукашэнка, віншуючы 14 красавіка вайскоўцаў і ветэранаў з Днём войскаў СПА. Паводле яго слоў, гэты род войскаў абсталяваны “самай сучаснай тэхнікай і ўзбраеннем”, у выніку чаго яны “дэманструюць выдатную палявую вывучку падчас мерапрыемстваў аператыўнай і баявой падрыхтоўкі”.

Міністр абароны Віктар Хрэнін у сваім віншаванні падкрэсліў, што ў сучасных умовах войскі СПА з’яўляюцца “стратэгічна важным і жыццёва неабходным кампанентам узброеных сіл”, а таксама “надзейным шчытом краіны”. Вайскоўцы, паводле яго слоў, “уносяць важкі ўклад у забеспячэнне ваеннай бяспекі” Беларусі.

Камандуючы Ваенна-паветранымі сіламі і войскамі СПА Андрэй Лук’яновіч заявіў, што “ва ўмовах глабальнай геапалітычнай перабудовы супрацьпаветраная абарона разглядаецца як асаблівы фактар стратэгічнага стрымлівання”.

Ён адзначыў, што “пастаянна абнаўляецца парк ўзбраення зенітных ракетных і радыётэхнічных частак: у злучэнні і воінскія часткі паступілі такія сучасныя ўзоры ўзбраення як ЗРК Сз-400, “Top-M2”, РЛС “Праціўнік” і “Раса”.