9 ліпеня, Позірк. За перыяд пасля прэзідэнцкіх выбараў 2020 года і да канца чэрвеня 2024-га ў Беларусі ліквідавана не менш як 1.696 некамерцыйных арганізацый (НКА) — аб’яднанняў, прафсаюзаў, фондаў, недзяржаўных устаноў і асацыяцый, гаворыцца ў новым аглядзе праваабарончай арганізацыі Lawtrend.
На канец траўня было ліквідавана не менш як 1.665 НКА, красавіка — 1.622, сакавіка — 1.601, лютага — 1.563, студзеня — 1.533, снежня 2023-га — 1.509. На канец снежня 2022 года налічвалася 1.173 закрытыя некамерцыйныя арганізацыі.
Паводле інфармацыі праваабаронцаў, на канец чэрвеня не менш як 1.061 НКА знаходзілася ў працэсе прымусовай ліквідацыі (1.033 — напрыканцы траўня, 1.003 — красавіка, 997 — сакавіка, 981 — лютага, 969 — студзеня, 960 — снежня 2023-га) з улікам пададзеных у суд іскаў, прымусовага выключэння з Адзінага дзяржрэгістра юрыдычных асоб і індывідуальных прадпрымальнікаў.
У месячным разрэзе колькасць арганізацый, якія прынялі рашэнне пра самастойную ліквідацыю, зменшылася. На канец чэрвеня такіх было 635, траўня — 632, красавіка — 619, сакавіка — 604, лютага — 582, снежня 2023-га — 564, снежня 2022-га — 416.
Адзначаецца, што рашэнне пра самаліквідацыю па-ранейшаму прымаецца ў асноўным праз ціск на членаў НКА, неспрыяльны прававы асяродак і грамадска-палітычную сітуацыю.
Lawtrend падкрэслівае, што ў Беларусі ўжо некалькі гадоў у дачыненні да грамадзянскіх актывістаў, прадстаўнікоў арганізацый грамадзянскай супольнасці актыўна выкарыстоўваецца заканадаўства аб супрацьдзеянні экстрэмізму. Улада “прызнае экстрэмісцкай любыя дзеянні, якія супярэчаць выбранаму ёю курсу”.
“Змяншэнне колькасці некамерцыйных арганізацый, якія прымаюць рашэнне аб ліквідацыі, з’яўляецца дадатковым фактарам, які сведчыць пра некаторую “нармалізацыю” сітуацыі ў краіне. Большасць некамерцыйных арганізацый, якія не лічаць магчымым працягваць сваю дзейнасць у сувязі са складанай грамадска-палітычнай сітуацыяй у краіне, ужо прынялі рашэнне аб самастойнай ліквідацыі або дзейнасць прыпынілі (у апошнім выпадку, яны існуюць альбо толькі “на паперы”, або ў дачыненні да іх падаецца іск аб прымусовай ліквідацыі”, — адзначаюць праваабаронцы.
Для падпісчыкаў “Позірк+”:
