Лукашэнка пацвердзіў гатоўнасць Беларусі ўсебакова супрацоўнічаць з Манголіяй

11 ліпеня, Позірк. Гатоўнасць Беларусі супрацоўнічаць з Манголіяй “ва ўсіх сферах, якія ўяўляюць узаемную цікавасць”, пацвердзіў Аляксандр Лукашэнка, віншуючы 11 ліпеня народ і прэзідэнта гэтай краіны Ухнаагійн Хурэлсуха з нацыянальным святам Наадам.

“Перакананы, што ў бліжэйшы час мы рэалізуем шэраг важных двухбаковых праектаў, пра якія мы дамовіліся падчас нашых сустрэч ва Улан-Батары, па лініі сельскай гаспадаркі і прамысловасці, адукацыі і навукі, моладзевых і жаночых арганізацый”, — прыводзіць тэкст паслання прэс-служба віншавальніка.

Наадам — традыцыйныя спаборніцтвы ў мангольскай барацьбе, скачках і стральбе з лука, якімі ў краіне адзначаюць сярэдзіну лета.

“Падчас наведвання Манголіі я змог асабіста адчуць дух гэтага спаборніцтва, які дэманструе адзінства, сілу і мужнасць вашага народа, які трапятліва шануе свае традыцыі і гісторыю”, — адзначыў Лукашэнка.

Лукашэнка наведваў Манголію з дзяржаўным візітам 1–4 чэрвеня. У перадапошні дзень паездкі ён падпісаў з прэзідэнтам гэтай краіны дамову аб дружалюбных стасунках і супрацы.

Падпісаныя міжурадавае пагадненне аб узаемным прызнанні дакументаў аб адукацыі, а таксама дарожная карта супрацы профільных міністэрстваў абедзвюх краін на 2024–2026 гады; мемарандум аб узаемаразуменні паміж Міністэрствам юстыцыі і ўнутраных спраў Манголіі і Міністэрствам транспарту і камунікацый Беларусі аб узаемным прызнанні і абмене пасведчання кіроўцы; дарожная карта супрацы ў галіне сельскай гаспадаркі ды інш.

Напярэдадні прыбыцця Лукашэнкі экс-прэзідэнт Манголіі Цахіягійн Элбэгдорж (2009–2017) заклікаў цяперашнія ўлады дзяржавы арыштаваць візіцёра, які “здзейсніў злачынствы супраць чалавечнасці”. Гэта, на яго думку, палепшыла б імідж краіны.

Дэмакратычны лідар Святлана Ціханоўская падзякавала мангольскаму палітыку за “рашучы заклік прыцягнуць беларускага дыктатара да адказнасці” і заявіла, што Лукашэнка “павінен паўстаць перад міжнародным трыбуналам”.