На фоне наступстваў непагадзі Ціханоўская заклікала беларусаў берагчы сябе і дзяцей

16 ліпеня, Позірк. “Быць асцярожнымі і берагчы сябе і сваіх дзяцей” заклікала беларусаў дэмакратычны лідар Святлана Ціханоўская ў сувязі з наступствамі нядаўняга ўраганнага ветру.

На сваёй старонцы ў “Інстаграме” палітык выказала спачуванні родным і блізкім пацярпелых і загінуўлых. У сацыяльнай сетцы Х яна адзначыла, што “ўзрушаная трагічнай гібеллю шасці чалавек”.

Многія жыхары на поўдні краіны, звярнула яна ўвагу, дагэтуль без электрычнасці. Ціханоўская адзначыла, што правяла “некалькі гадоў у гэтым цудоўным рэгіёне” разам са сваім мужам Сяргеем Ціханоўскім. “Мае думкі з усімі, хто пацярпеў”, — напісала палітык.

Паводле актуальных даных МНС, у выніку праходжання 14 ліпеня навальнічнага фронту з моцнымі парывамі ветру пацярпела 594 населеныя пункты ў 33 раёнах. Ахвярамі непагадзі сталі шэсць чалавек, у тым ліку двое дзяцей.

Міністэрства энергетыкі паведаміла, што праз наступствы непагадзі ў 700 населеных пунктах Беларусі дагэтуль няма электрычнасці.

Паводле даных ведамства, за мінулыя суткі адноўлена электразабеспячэнне 783 населеных пунктаў краіны. Для гэтага было задзейнічана больш за 200 аварыйных брыгад і звыш 200 адзінак тэхнікі.