У Ціханоўскай змяніўся дарадца па прававых пытаннях

17 ліпеня, Позірк. У Святланы Ціханоўскай змяніўся дарадца ў прававых пытаннях: замест Крысціны Рыхтэр гэтую пасаду будзе займаць Леанід Марозаў. Першым пра гэта паведаміў партал “Люстэрка”.

Рыхтэр, якая працавала ў офісе дэмакратычнага лідара з сярэдзіны 2021 года, быў прызначаны дарадцай 29 снежня 2022 года. У яе абавязкі ўваходзілі каардынацыя работы па прыцягненні да адказнасці асоб, якія маюць дачыненне да парушэнняў правоў чалавека, з выкарыстаннем інструментаў універсальнай юрысдыкцыі і іншых міжнародных механізмаў, падрыхтоўка нарматыўна-прававых дакументаў для транзітнага перыяду ў сферах “пераходнай справядлівасці”, рэабілітацыі асоб, якія зведалі пераслед з палітычных матываў, удзел у падрыхтоўцы спецыяльнага дакладу па праблемах беларусаў у эміграцыі ў Парламенцкай асамблеі Савета Еўропы і інш.

У 2023 годзе офіс распрацаваў праект Канцэпцыі кампенсацыі шкоды асобам, рэпрэсаваным рэжымам Лукашэнкі. Яго сутнасць Рыхтэр патлумачыла ў інтэрв’ю “Позірку”.

“Я ўдзячная Крысціне. Яна прарабіла вялікую працу, арганізавала дзейнасць юрыдычнай каманды, вывела офіс на высокі ўзровень. З прыходам Леаніда справа Крысціны будзе працягнутая. Ён высокакваліфікаваны спецыяліст і будзе працаваць па тых жа напрамках”, — заявіла “Позірку” Святлана Ціханоўская.

Паводле слоў яе галоўнага дарадцы Франака Вячоркі, кандыдатуру Марозава прапанавала сама Рыхтэр. “Думаю, гэта арганічнае абнаўленне офіса”, — сказаў дарадца.

36-гадовы Марозаў скончыў Міжнародны інстытут МІПСА (ранней — Міжнародны інстытут працоўных і сацыяльных адносін, Вышэйшая школа прафсаюзнага руху Беларусі) па спецыяльнасці “міжнароднае публічнае права”, працаваў там жа да 2016 года, пасля чаго быў звольнены з палітычных матываў. Прадстаўляў Беларускі нацыянальны моладзевы савет “РАДА” на міжнародным узроўні.