Інтэрпол выключыў рэжысёра Гнёта з “чырвонага спісу” асоб, якія адшукваюцца
19 ліпеня, Позірк. Інтэрпол выключыў беларускага рэжысёра і журналіста Андрэя Гнёта з “чырвонага спісу” асоб, якія знаходзяцца ў міжнародным вышуку.
Як паведамляе Беларуская асацыяцыя журналістаў, адпаведная інфармацыя змяшчаецца ў лісце Генеральнага сакратарыята Інтэрпола на адрас прадстаўніцтва Еўрасаюза ў Сербіі.
“Інтэрпол прызнае палітычную падаплёку справы журналіста. Як вынікае з ліста (служба маніторынгу БАЖ мае яго ў сваім распараджэнні), знаходжанне Андрэя Гнёта ў “чырвоным спісе” супярэчыць артыкулам 2 і 3 Статута Міжнароднай арганізацыі крымінальнай паліцыі”, — адзначае асацыяцыя журналістаў.
29 лютага паведамлялася, што Інтэрпол праводзіць праверку падстаў вышуку рэжысёра беларускім уладамі.
41-гадовы Гнёт — рэжысёр тэлерэкламы і музычных кліпаў, журналіст і сузаснавальнік аб’яднання SOS.by, прызнанага ў Беларусі “экстрэмісцкім фарміраваннем”. Працаваў з вядомымі брэндамі, сярод якіх МТС, Mark Formelle, “Бульбашъ”, “Аліварыя”, “Спартак”, “Беллакт”, World Of Tanks.
Быў затрыманы 30 кастрычніка 2023 года памежнай службай Сербіі пасля прылёту ў Бялград, пасля чаго перададзены паліцыі. Прычына затрымання — знаходжанне ў міжнародным вышуку на запыт беларускага бюро Інтэрпола ад 21 верасня 2023 года. Ведамства прасіла экстрадаваць Гнёта ў Беларусь для крымінальнага пераследу.
Праваабаронцы і адвакат Гнёта настойваюць, што ён пераследуецца па палітычных, а не эканамічных матывах, як сузаснавальнік SOS.by.
31 траўня суд у Бялградзе пастанавіў, што патрабаванне выдаць Гнёта беларускім праваахоўным органам законнае і павінна быць задаволенае” ў мэтах яго прыцягнення да крымінальнай адказнасці па абвінавачванні ў здзяйсненні крымінальнага злачынства паводле ч. 2 арт. 243 Крымінальнага кодэкса (ухіленне ад выплаты падаткаў) <…> на падставе пастановы аб узбуджэнні крымінальнай справы ў дачыненні да абвінавачанага ад 08.11.2023 года”.
Рашэнне Гнёт і яго адвакат атрымалі 13 чэрвеня і падалі апеляцыю.
Цяпер рэжысёр знаходзіцца ў Бялградзе пад хатнім арыштам.