Памежнікі канфіскавалі чарговы беспілотнік на мяжы з Літвой

23 ліпеня, Позірк. Грамадзянін Беларусі з беспілотным апаратам самалётнага тыпу затрыманы 23 ліпеня ў вёсцы Ёцішкі (Варонаўскі раён Гродзенскай вобласці) паблізу мяжы з Літвой, паведамляе прэс-служба Дзяржаўнага пагранічнага камітэта.

У дачыненні да затрыманага распачаты адміністрацыйны працэс. Памежнікі канфіскавалі беспілотнік і акумулятар да яго.

Ведамства чарговы раз нагадала, што 1 красавіка набыў моц указ, які забараняе ўвозіць, захоўваць, эксплуатаваць, вырабляць беспілотнікі і выкарыстоўваць паветраную прастору краіны без дазволу.

Адзначаецца таксама, што за незаконнае ўтрыманне і выкарыстанне беспілотнікаў у памежнай зоне або паласе прадугледжаны штраф да 50 базавых велічыняў (2.000 рублёў) паводле арт. 24.19 КаАП.

Беспілотнікі нярэдка выкарыстоўваюць для дастаўкі ў Літву кантрабандных грузаў, напрыклад, цыгарэт. На пачатку ліпеня Дзяржпагранкамітэт паведаміў пра затрыманне дзвюх груп грамадзян, якія падазраюцца ў парушэнні мяжы з прымяненнем квадракоптараў.

Памежнікі таксама затрымлівалі аператараў беспілотных апаратаў у красавіку, траўні, чэрвені.

У выніку атакі БПЛА 26 лютага 2023 года ў Мачулішчах (Мінскі раён) атрымаў пашкоджанні і быў транспартаваны на рамонт у РФ дарагі расійскі вайсковы самалёт далёкага радыёлакацыйнага выяўлення А-50.

7 сакавіка таго ж года, тлумачачы прычыны дыверсіі на вайсковым аэрадроме ў Мачулішчах, Аляксандр Лукашэнка заявіў, што сістэмы СПА не змаглі выявіць дрон з выбухоўкай, бо ён быў “маленькі”.