Дэмсілы рэкамендавалі беларусам, якія пражываюць у ЕС, зарэгістраваць аўтамабілі ў еўрапейскіх юрысдыкцыях
23 ліпеня, Позірк. Дэмакратычныя сілы будуць дамагацца паслаблення абмежаванняў для аўтамабіляў з беларускімі нумарамі пры ўездзе і знаходжанні на тэрыторыі Еўрасаюзу, заявіў 23 ліпеня галоўны дарадца дэмакратычнага лідара Святланы Ціханоўскай Франак Вячорка.
Відэакаментарый палітыка апублікаваны ў тэлеграм-канале Ціханоўскай.
Вячорка падкрэсліў, што ўведзеныя ЕС 29 чэрвеня санкцыі павінны былі ўдарыць па рэжыме Аляксандра Лукашэнкі, але “ўскосна закранулі і беларусаў”.
Дарадца канстатаваў, што Польшча, Літва, Латвія і Эстонія пагадзіліся ўвесці розныя выключэнні для аўтамабіляў, зарэгістраваных у Беларусі, аднак рэкамендаваў аўтаўладальнікам-суайчыннікам, якія знаходзяцца на тэрыторыі ЕС, зарэгістраваць свае транспартныя сродкі ў еўрапейскіх юрысдыкцыях.
“У Літве гэта досыць хутка і нядорага, у Польшчы трошкі складаней — працуем над тым, каб працэдуру спрасціць. Але калі вы гэтага не зробіце, праз некаторы час могуць узнікнуць праблемы, у тым ліку можа быць накладзены штраф. Каб гэтага пазбегнуць, лепш паклапаціцца загадзя”, — сказаў Вячорка.
Беларускі рэжым, дадаў ён, “выкарыстоўвае тэму абмежаванняў вельмі актыўна”: “Закідвае фэйкі, дэзінфармацыю. Але ўведзеныя абмежаванні б’юць па рэжыме ў першую чаргу: яны закрываюць вялікую колькасць шчылін [у санкцыях]”.
“Мы будзем адстойваць інтарэсы беларусаў, змагацца за вас. Заўтра я еду ў Талін і буду размаўляць з прадстаўнікамі ўрада, каб дамагчыся пэўных ільгот для беларусаў”, — рэзюмаваў дарадца Ціханоўскай.
23 ліпеня ў беларускіх тэлеграм-каналах і чатах з’явіліся паведамленні аб забароне з 1 жніўня ўезду ў Польшчу беларускіх аўтамабіляў. Гэтую інфармацыю апублікавалі некаторыя незалежныя СМІ. Яна была зняпраўджаная офісам Ціханоўскай са спасылкай на польскае МЗС.
Раней 23 ліпеня ў каментары “Позірку“ Вячорка паведаміў, што Польшча ўвяла “найбольш мяккія абмежаванні, якія дазваляюць праязджаць праз мяжу на беларускіх нумарах, калі за рулём беларусы”, Літва фактычна адтэрмінавала на месяц забарону для праезду зарэгістраваных у Беларусі аўто, Латвія і Эстонія “ўвялі абмежаванні, але з выключэннямі толькі на падставе гуманітарных прычын”.
22 ліпеня ў Вільнюсе паміж офісам Ціханоўскай і прадстаўнікамі Польшчы, Літвы, Латвіі і Эстоніі адбыліся кансультацыі па новых абмежаваннях на ўезд аўтамабіляў з беларускай рэгістрацыяй.