У Кіеўскім нацыянальным універсітэце адновяць вывучэнне беларускай мовы
24 ліпеня, Позірк. У Кіеўскім нацыянальным універсітэце імя Тараса Шаўчэнкі адновяць вывучэнне беларускай мовы, паведаміў на брыфінгу 23 ліпеня рэктар ВНУ Уладзімір Бугроў.
“Беларуская мова не з’яўляецца толькі мовай самаабвешчанага прэзідэнта Аляксандра Лукашэнкі. Гэта мова беларускага народа, воінаў беларускіх фарміраванняў, якія ў складзе Узброеных сіл Украіны змагаюцца за свабоду і незалежнасць і для Украіны, і для сваёй радзімы”, — цытуе Бугрова агенцтва “Укрінформ”.
Паводле слоў рэктара, выкладанне беларускай мовы будзе арганізавана на кафедры славянскай філалогіі.
Кіеўскі нацыянальны універсітэт ім. Шаўчэнкі — адзін з найбуйнейшых ВНУ Украіны, нацыянальны цэнтр навукі і культуры, адзін з найстарэйшых універсітэтаў краіны. Заснаваны ў 1834 годзе.
Праз падтрымку рэжымам Лукашэнкі расійскай агрэсіі ва Украіне ўлады гэтай краіны прынялі шэраг рашэнняў па скарачэнні прысутнасці беларускай культуры ў адукацыйнай і іншых сферах. Сярод іншага Міністэрства асветы выключыла са школьнай праграмы творы Васіля Быкава і Янкі Купалы.
Разам з тым ва ўкраінскіх гарадах называюць вуліцы імёнамі беларускіх добраахвотнікаў, якія загінулі ў вайне супраць расійскай агрэсіі.
У Чарнігаве могуць з'явіцца вуліца і завулак Кастуся Каліноўскага
7 лютага, Позірк. Вуліца і завулак Кастуся Каліноўскага могуць у хуткім часе з'явіцца ва ўкраінскім Чарнігаве. Гэта вынікае з праекту рашэння гарадской рады. Згодна з праектам, перайменаванне падлягаюць 24 вуліцы і завулка. Імя Каліноўскага плануецца прысвоіць вуліцы і завулку, якія …