Пасля пашырэння бязвізу Беларусь наведала 7.219 жыхароў краін Еўропы

29 ліпеня, Позірк. З 19 па 29 ліпеня Беларусь у бязвізавым парадку наведала 7.219 жыхароў краін Еўропы, паведамляе прэс-служба Дзяржаўнага пагранічнага камітэта.

Акрамя грамадзян Польшчы, Літвы, а таксама грамадзян і неграмадзян Латвіі, для якіх спрошчаны парадак уезду дзейнічае ўжо некалькі гадоў, з моманту пашырэння бязвізу ў краіну прыбыла 455 жыхароў іншых краін ЕС — у асноўным Германіі (181) і Эстоніі (111).

З 1 студзеня 2024 года бязвізавым уездам у Беларусь скарысталася 126.763 жыхары краін ЕС, з вясны-лета 2022-га — 927.369.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. Аляксандр Лукашэнка некалькі разоў падаўжаў яго тэрмін, апошні раз — да канца 2024 года.

З 19 ліпеня беларускія ўлады распаўсюдзілі бязвізавы рэжым на грамадзян яшчэ 35 краін Еўропы. Большасць з іх рэжым Лукашэнкі лічыць “недружалюбнымі” — за тое, што ўвялі або далучыліся да санкцый.

Згодна з апублікаванай 17 ліпеня заявай Міністэрства замежных спраў, гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

З 8:00 19 ліпеня яны могуць уязджаць у Беларусь без візы праз усе наземныя і паветраныя міжнародныя пункты пропуску “па сапраўдных дакументах”, знаходзіцца на беларускай тэрыторыі “не больш за 30 сутак з дня ўезду”.

Бязвіз будзе дзейнічаць да канца 2024 года.