Журналіста Кіркевіча завочна прыгаварылі да 7 гадоў пазбаўлення волі

6 жніўня, Позірк. Журналіст-фрылансер, краязнаўца, былы намеснік старшыні арганізацыі “Малады фронт” (не была зарэгістраваная ў Беларусі) Аляксандр (Алесь) Кіркевіч завочна прыгавораны да 7 гадоў пазбаўлення волі, паведамляе Беларуская асацыяцыя журналістаў (БАЖ).

Паводле інфармацыі БАЖ, рашэнне 2 жніўня вынес Гродзенскі абласны суд. Ён таксама пастанавіў спагнаць з Кіркевіча штраф у памеры 600 базавых велічыняў (24 тыс. рублёў).

Мужчына прызнаны вінаватым паводле ч. 1 і 2 арт. 361⁴ КК (садзейнічанне экстрэмісцкай дзейнасці).

Згодна з інфармацыяй праваабарончага цэнтра “Вясна”, яго асудзілі за інтэрв’ю “Белсату” і “Радыё Свабода”, якія ўлады лічаць “экстрэмісцкімі фарміраваннямі”.

Кіркевіч — былы палітвязень. 5 кастрычніка 2011 года ён быў прыгавораны да 4 гадоў пазбаўлення волі за ўдзел у пратэстнай акцыі ў Мінску пасля прэзідэнцкіх выбараў 19 снежня 2010 года. Пасля быў памілаваны на падставе ўказу Аляксандра Лукашэнкі.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчымая па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый ды інш.

Першыя спецвытворчасці былі адкрытыя 26 верасня 2022 года. Працэдура ўжо ўжытая ў дачыненні да больш як сотні грамадзян.