Турарбекава пакінула Каардынацыйную раду 

5 жніўня, Позірк. Пра выхад з Каардынацыйнай рады паведаміла лідар кааліцыі “Наша справа” Роза Турарбекава. Яна адзначыла, што зрабіла гэта па шэрагу прычын, перш за ўсё асабістага характару.

Яна падзякавала калегам і выбарцам, адзначыўшы, што яны аддалі галасы за праграму “Нашай справы” пад лозунгам “Не жалезнай заслоне”.

“Наш парадак дня прыцягнуў увагу ўсіх актараў у беларускім дэмакратычным руху, — сказала Турарбекава. — Мы дамагліся таго, што ўсе пункты праграмы сталі важнымі для ўсіх. Аднак гэтая праблема патрабуе нестандартных падыходаў і рашэнняў, змены падыходаў, а не проста ўключэння іх у рэактыўную пазіцыю”.

Турарбекава паведаміла, што падчас канферэнцыі “Новая Беларусь” прапаноўвала некаторыя новыя падыходы, сутнасць якіх сфармуляваная ў тэзісах “Беларусь не чорная дзірка”, “Баланс паміж сек’юрытызацыяй і еўрапеізацыяй Беларусі”.

“Мае паплечнікі па фракцыі працягнуць працу над імплементацыяй праграмы ў КР, выкарыстоўваючы ўсе даступныя рэсурсы”, — падсумавала Турарбекава.

Роза Турарбекава — былы выкладчык кафедры міжнародных адносін Беларускага дзяржаўнага ўніверсітэта (БДУ), кандыдат гістарычных навук, палітолаг. У 2021 годзе яе звольнілі з БДУ па палітычных матывах.

“Наша справа” стала ўдзельнікам “Платформы 2025”, пра што было абвешчана 3 жніўня ў Вільнюсе на канферэнцыі”Новая Беларусь”.

Муж Турарбекавай гісторык Павел Церашковіч прайшоў у КР па спісе “Нашай справы”. У канцы лістапада мінулага года ў іх мінскай кватэры прайшоў ператрус.

Выбары ў КР адбыліся 25-27 траўня, на іх прагаласавала 6.723 чалавекі. Па выніках электаральнай кампаніі ў структуру абрана 80 дэлегатаў, якія прадстаўляюць 8 блокаў: “Каманда Латушкі і Рух “За Свабоду” (28 дэлегатаў), “Блок Пракоп’ева — Ягорава” (13), “Еўрапейскі выбар” (8), “Незалежныя беларусы” (8), “Моладзевы наступ” (8), “Воля” (6), “Наша справа” (6) і “Хопіць баяцца!” (3).