Сілавікі працягваюць удзельнічаць ва ўборцы палёў

6 жніўня, Позірк. Супрацоўнікі сілавых ведамстваў працягваюць дапамагаць аграрыям ва ўборцы ўраджаю з палёў, вынікае з інфармацыі іх прэс-службаў.

Вайскоўцы 11-й асобнай гвардзейскай механізаванай брыгады (Слонім, Гродзенская вобласць) працуюць на палях Гомельскай і Віцебскай абласцей, паведамляе прэс-служба Мінабароны. Яны надаюць дапамогу “не толькі ва ўборцы і перавозцы прыбранага ўраджаю, але і транспартуюць грузы сельскагаспадарчага значэння”.

Раней паведамлялася аб удзеле ва ўборачнай кампаніі вайскоўцаў 36-й дарожна-маставой брыгады (Пінск, Брэсцкая вобласць) і аднаго са зводных аўтамабільных узводаў Узброеных сіл у Жлобінскім раёне (Гомельская вобласць).

5 жніўня прэс-служба ўнутраных войскаў МУС паведаміла, што іх прадстаўнікі “у якасці камбайнераў прыбіраюць пшаніцу ў Шклове і аграгарадку Александрыя” (Магілёўская вобласць, родныя мясціны Аляксандра Лукашэнкі), да іх далучыліся “байцы, якія маюць правы трактарыстаў”.

Усяго згадвалася дзесяць вайскоўцаў, у тым ліку з вайсковай часткі 3310 (вайсковы гарадок Аколіца на поўначы ад Мінска).

Прадстаўнікі Міністэрства па надзвычайных сітуацыях займаюцца наглядам за выкананнем правілаў пажарнай бяспекі і рэгламентаў тэхналагічнага працэсу сушкі збожжа, укамплектаванасцю камбайнаў першаснымі сродкамі пажаратушэння, а таксама “самі працуюць камбайнерамі, кіроўцамі на перавозцы збожжа, аператарамі зернесушыльных комплексаў”, вынікае з інфармацыі ведамства.

2 жніўня ў Карэліцкім раёне (Гродзенская вобласць) мясцовы РАНС камандзіраваў на ўборку дзесяць сваіх супрацоўнікаў.

Пра ўдзел вайскоўцаў унутраных войскаў МУС ва ўборачнай кампаніі паведамлялася 21 ліпеня.

Паводле звестак Міністэрства сельскай гаспадаркі і харчавання, на раніцу 6 жніўня было сабрана збожжа (з улікам рапсу) 6 млн 390 тыс. т: збожжавых і зернебабовых культур — 5 млн 337 тыс. т, азімага рапсу — 1 млн 53 тыс. т.

У рэгіянальным разрэзе сітуацыя са зборам збожжа (з улікам рапсу) наступная: Мінская вобласць — 1 млн 723,5 тыс. т, Брэсцкая — 1 млн 459 тыс. т, Гродзенская — 1 млн 428,1 тыс. т, Магілёўская — 670,4 тыс. т, Гомельская — 627 тыс. т, Віцебская — 482 тыс. т.

На прэс-канферэнцыі 3 красавіка намеснік міністра сельскай гаспадаркі і харчавання Уладзімір Гракун заявіў, што ў 2024 годзе павінна быць сабрана больш за 10 млн т збожжавых, уключаючы рапс і кукурузу. Паводле яго слоў, пастаўлена задача аб павелічэнні збору збожжа ў Віцебскай, Магілёўскай і Гомельскай абласцях, дзе ўраджай гэтых культур быў невысокім.