21 ліпеня, Позірк. Вайскоўцы ўнутраных войскаў МУС бяруць удзел ва ўборачнай кампаніі, а таксама накіраваныя на ліквідацыю наступстваў непагадзі, паведамляе ведамасны тэлеграм-канал.
Уборкай ўраджаю занятыя “байцы, якія праходзяць службу па прызыве і кантракце”, гаворыцца ў паведамленні. “Згуртаваным працоўным калектывам” яны “штодня збіраюць ураджай рапсу”, а “зусім хутка пачнуць уборку пшаніцы”.
Работы праходзяць на палях ААТ “Александрыйскае” ў Шклоўскім раёне (Магілёўская вобласць).
Таксама заяўляецца, што вайскоўцы “працягваюць дапамагаць грамадзянам у ліквідацыі наступстваў непагадзі”.
“Байцы вайсковай часці 3310 не засталіся ўбаку і аказалі дапамогу жыхарам Мінскага раёна. Асноўныя намаганні былі накіраваныя на расчыстку дарог і дваровых тэрыторый ад паваленых дрэў”, — паведамляе тэлеграм-канал.
Асабісты склад вайсковай часці 5525 унутраных войскаў “старанна працаваў у Рэчыцы” (Гомельская вобласць), дзе “стыхія пакінула пасля сябе нямала разбурэнняў”.
Непагадзь 13 і 14 ліпеня ў Беларусі прывяла да маштабных пашкоджанняў у сістэме электраперадачы, парушэнняў водазабеспячэння, разбурэнняў.
Больш за ўсё ад ураганнага ветру пацярпела Гомельская вобласць, дзе ўводзілі рэжым надзвычайнай сітуацыі.
Паводле інфармацыі МНС, у гэтыя дні з-за стыхіі загінула шэсць чалавек.
На раніцу 21 ліпеня без энергазабеспячэння заставаліся “асобныя домаўладанні” ў Жлобінскім і Рэчыцкім раёнах (Гомельская вобласць), паведаміў міністр энергетыкі Віктар Каранкевіч на пасяджэнні аператыўнага штаба па ліквідацыі наступстваў непагадзі ў рэгіёне.
На селектарнай нарадзе з прадстаўнікамі сваёй адміністрацыі, урада і мясцовых уладаў 19 ліпеня Лукашэнка запатрабаваў прыцягнуць да ліквідацыі наступстваў непагадзі ў тым ліку палітвязняў.
“Я ўжо казаў міністру ўнутраных спраў (ён падключыцца, ён ведае), у нас больш за 20 тысяч сядзельцаў і так званыя палітвязні. Туды — на прасеку. Дапамажыце краіне. <…> І гараджан, і асабліва гэтых дармаедаў”, — сказаў ён.
Ён загадаў адправіць на адпаведныя працы жыхароў Беларусі ў цэлым, адзначыўшы, што “адгаворкі тыпу таго, што я не пайду, не хачу, не буду, не прымаюцца”.
“Упаўнаважаныя прэзідэнта і памочнікі на месцах, прымайце рашучыя дзеянні. Не павінна быць “не”. Я яшчэ раз кажу, гэта раўнасільна вайне, толькі без стральбы. Таму ўсе павінны, перш чым “заціктокацца” там і чагосьці ў інтэрнэце піснуць… Ідзі вазьмі сякеру, пілу і дапамажы нешта… А потым крытыкуй ўздоўж і папярок. Мабілізоўвайце насельніцтва”, — даручыў ён.
На той жа нарадзе Лукашэнка раскрытыкаваў грамадзян, “для якіх усё заўсёды будзе дрэнна”, якія “не хочуць разумець”, што ў мінулыя дні ў краіне адбылася “надзвычайная сітуацыя”.
Паводле яго слоў, ёсць людзі, якія дапамагаюць прыбіраць завалы і паваленыя дрэвы, аказваюць садзейнічанне камунальнікам. Гэта, лічыць ён, “сапраўдныя мужыкі”. Ім спікер супрацьпаставіў тых, хто “пальцам не варухне”, пакуль “улады не вырашаць усе праблемы”.
Лукашэнка таксама раскрытыкаваў органы ўлады, якія займаліся ліквідацыяй наступстваў непагадзі. Паводле яго сцвярджэння, на першым этапе “адэкватнай рэакцыі на гэтую падзею — хуткай, выразнай, ваеннай — не было”.
