Савет Рэспублікі ўхваліў законапраект аб пазбаўленні пенсій сілавікоў, якія пакінулі Беларусь

25 верасня, Позірк. Савет Рэспублікі Нацыянальнага сходу (СР НС) ухваліў 25 верасня законапраект, які сярод іншага прадугледжвае пазбаўленне пенсій “ветэранаў сілавых структур” у выпадку іх пераезду на месца жыхарства ў іншыя краіны.

Паводле слоў члена пастаяннай камісіі СР НС па міжнародных справах і нацыянальнай бяспецы Валерыя Гайдукевіча (цытуецца па паведамленні прэс-служба верхняй палаты парламента), прыняцце дакумента з’яўляецца “адказам на дзеянні недружалюбных краін у частцы пенсійнага забеспячэння ветэранаў сілавых структур”.

Законапраект, адзначыў Гайдукевіч, вызначае “адзіныя ўмовы і парадак пенсійнага забеспячэння ваеннаслужачых, асоб начальніцкага і радавога складу ўсіх сілавых ведамстваў, а таксама членаў іх сем’яў у выпадках афармлення імі выезду для пастаяннага пражывання за межамі або прыбыцця для пастаяннага пражывання ў Беларусь”.

Член СР НС падкрэсліў, што дакументам “прадугледжваюцца пэўныя льготы для тых, хто пражывае на тэрыторыі Беларусі, а хто з’язджае ў недружалюбныя краіны — яны пазбаўляюцца іх”.

“Гэта тычыцца тых людзей, якія цяпер прымаюць рашэнне пакінуць Беларусь. Яны павінны разумець, што пенсіяй яны забяспечвацца не будуць”, — сказаў ён.

4 траўня 2021 года Аляксандр Лукашэнка падпісаў указ аб пазбаўленні больш за 80 былых вайскоўцаў і супрацоўнікаў сілавых ведамстваў воінскіх і спецыяльных званняў.

У дакуменце адзначалася, што асобныя вайскоўцы і супрацоўнікі сілавых ведамстваў нагняталі пратэстныя настроі ў грамадстве, арганізоўвалі і ўдзельнічалі ў несанкцыянаваных мерапрыемствах, размяшчалі ў інтэрнэце экстрэмісцкія матэрыялы.

У дачыненні да некаторых сілавікоў распачатыя крымінальныя справы, у тым ліку за нібыта “арганізацыю актаў тэрарызму”.