“Балада пра дыктатара” ў Беларусі падышла да канца — Латушка

1 кастрычніка, Позірк. Дзень, калі Літва накіравала ў Міжнародны крымінальны суд (МКС) матэрыялы аб злачынствах Аляксандра Лукашэнкі, “увойдзе ў гісторыю”, заявіў 1 кастрычніка падчас прэс-канферэнцыі ў Гаазе (Нідэрланды) кіраўнік Народнага антыкрызіснага ўпраўлення (НАУ), намеснік кіраўніка Аб’яднанага пераходнага кабінета Павел Латушка.

Гэты дзень увойдзе і ў “асабістую гісторыю Лукашэнкі”, “а дакладней — асабістую крымінальную справу дыктатара”, сказаў палітык.

Паводле яго слоў, Лукашэнка “ўвойдзе ў гісторыю менавіта як міжнародны злачынец”.

Латушка адзначыў, што “пайшоў ужо чацвёрты дзясятак гадоў, як Лукашэнка будуе свой рэжым рэпрэсій і гвалту”. “Фармаванне гэтага рэжыму сапраўды блізкае да сваёй найвышэйшай кропкі”, — сказаў палітык (у 1995 годзе ў інтэрв’ю нямецкай дзелавой газеце Handelsblatt Лукашэнка пахваліў Адольфа Гітлера, заявіўшы, што “нямецкі парадак фармаваўся стагоддзямі” і “пры Гітлеры гэтае фармаванне дасягнула найвышэйшага пункту”. — “Позірк”.).

“Удумайцеся: у краіне з насельніцтвам у 9 мільёнаў чалавек дыктатарам учыненыя сотні тысяч злачынстваў супраць чалавечнасці”, — адзначыў кіраўнік НАУ.

“Лукашэнка думаў, што зможа “перавярнуць старонку” сваіх злачынстваў. Не. Яго “балада пра дыктатара” (адсылка да аднайменнай кампазіцыі, прадстаўленай на прапагандысцкім мерапрыемстве з нагоды Дня народнага адзінства 17 верасня. — “Позірк”.) падышла да канца. І так, мы выключым цябе, Лукашэнка, з вялікай палітыкі. Як і абяцалі. Ты — злачынец. Наступная станцыя — Гаага”, — падкрэсліў Латушка.

Беларускія ўлады, паводле яго слоў, прадаўжаюць пераследаваць беларусаў за мяжой “з жахлівай эфектыўнасцю”: “Судовыя пераследы, арышты сваякоў і сяброў, рыторыка нянавісці, пагрозы гвалту, запалохвання, канфіскацыя і знішчэнне маёмасці ў Беларусі — гэта толькі частка таго, што Лукашэнка і яго саўдзельнікі робяць сёння ў еўрапейскіх краінах”.

На працягу чатырох апошніх гадоў, паводле сцвярджэння палітыка, беларусы “жылі ў стане поўнай асуджанасці” і цяпер народ, “прайшоўшы праз пекла страт за мірную абарону дэмакратычных каштоўнасцяў, адчувае сябе пакінутым і забытым”.

“Аднак сёння сотні тысяч ахвяр здабылі надзею на справядлівасць. Надзею на тое, што аднойчы вінаватыя будуць прыцягнутыя да адказнасці”, — адзначыў Латушка.

Ён назваў “неверагоднай” працу, праведзеную пры падрыхтоўцы матэрыялаў для МКС Міністэрствам юстыцыі Літвы, юрыстамі і экспертамі.

“Па сутнасці, яны стварылі новы прэцэдэнт. Упершыню ў практыцы МКС дзяржава — удзельнік Рымскага статута перадала сітуацыю ў офіс пракурора ў дачыненні да дзяржавы, якая не з’яўляецца ўдзельнікам гэтага статута”, — канстатаваў кіраўнік НАУ.

Пра тое, што ўрад Літвы перадаў у офіс пракурора МКС матэрыялы пра “трансгранічныя злачынствы супраць чалавечнасці, учыненыя Аляксандрам Лукашэнкам і яго саўдзельнікамі ў дачыненні да беларусаў”, стала вядома 30 верасня. Матэрыялы перададзеныя па просьбе і на падставе дакументаў, падрыхтаваных НАУ.

Урад Літвы заявіў, што зрабіў гэта, бо “больш не можа сядзець склаўшы рукі”.

Беларускія дэмакратычныя сілы заклікалі краіны, якія ратыфікавалі Рымскі статут, падтрымаць намаганні Літвы па прыцягненні Лукашэнкі да адказнасці ў МКС.

У каментарыі пракурора МКС Карыма Хана, апублікаваным 30 верасня на сайце суда, гаворыцца, што перадача дзяржавай — удзельніцай Рымскага статута заявы ў Міжнародны крымінальны суд не прыводзіць аўтаматычна да пачатку расследавання.

“Я магу пацвердзіць, што мой офіс правядзе папярэдняе расследаванне для вывучэння запыту ў межах юрысдыкцыі МКС і вызначыць на аснове ўстаноўленых законам патрабаванняў, ці ёсць разумныя падставы для пачатку расследавання”, — гаворыцца ў каментары.

Кіраўнік Народнага антыкрызіснага ўпраўлення Павел Латушка ў відэазвароце 30 верасня выказаў надзею на тое, што ў выніку перадача матэрыялаў у МКС “прывядзе да ордэра на арышт Лукашэнкі”.