Плануецца адмяніць абмежаванні па памеры пенсій у працуючых пенсіянераў
15 кастрычніка, Позірк. Аляксандр Лукашэнка на нарадзе 15 кастрычніка падтрымаў праект указа, з прыняццем якога пенсіянеры, якія працуюць, змогуць атрымліваць пенсію без абмежаванняў, паведамляе прэс-служба Міністэрства працы і сацыяльнай абароны.
Як заявіла па выніках мерапрыемства кіраўнік ведамства Наталля Мядзведзева, праект знаходзіцца “ў стадыі рэдакцыйнай дапрацоўкі”.
У прыватнасці, прапанаваныя змяненні датычацца зняцця абмежавання па памеру пенсій у працуючых пенсіянераў, адміністравання (разлікаў) і назначэння пенсій для будучых пенсіянераў, пенсіённага забеспячэння для шматдзетных бацькоў, бацькоў дзяцей-інвалідаў, магчымасцей атрымання пенсіі дома.
Лукашэнка на нарадзе заявіў, што пенсіянеры, якія могуць працаваць, самі прапануюць свае паслугі на рынку працы.
“Што тут дрэннага? Калі чалавек жадае, трэба даць яму такую магчымасць працаваць”, — цытуе Лукашэнку яго прэс-служба.
Паводле яго, пра такое жаданне тых, хто выйшаў на пенсію, заяўляюць і прафсаюзы: “Натуральна, для таго, каб людзі працавалі, павінны быць створаны нармальныя ўмовы. Ну і запатрабаванасць на рынку працы, як вядома, вельмі вялікая”.
“Мы сёлета двойчы паднімалі пенсіі. 10% і 5%. Пенсіянеры ёсць пенсіянеры. Іх мы падтрымлівалі і будзем падтрымліваць. Яны павінны жыць нармальна”, — падкрэсліў Лукашэнка.
Ён звярнуў увагу, што некаторыя пенсіянеры звяртаюцца наконт назначэння пенсіі. Таму, распарадзіўся Лукашэнка, “трэба па максімуме дэбюракратызаваць гэты працэс”: “Працэдура павінна быць канкрэтная: пару дзён — і чалавек пайшоў на пенсію, аформіў сабе пенсію”.
Дзейным заканадаўствам прадугледжваюцца розныя ўмовы выплаты пенсій для пенсіянераў, якія працуюць і не працуюць.
У поўным памеры выплачваюцца пенсіі працуючым у сельскай гаспадарцы, а таксама пенсіянерам, у якіх індывідуальны каэфіцыент заробку не перавышае 1,3.
У каго ён вышэйшы, тая частка пенсіі, якая налічана з улікам заробку звыш каэфіцыента 1,3, у перыяд працы або калі пенсіянер з’яўляецца індывідуальным прадпрымальнікам, не выплачваецца.
Апошняе павышэнне пенсій адбылося з 1 кастрычніка.
Як паведамілі ў прэс-службе Міністэрства працы і сацыяльнай абароны, будуць павялічаны ўсе віды працоўных пенсій (па ўзросту, за выслугу гадоў, па інваліднасці, з нагоды страты карміцеля).
“Паводле папярэдняй ацэнкі, сярэдні памер пенсіі па ўзросце ў кастрычніку складзе 852 рублі. Гадавое павелічэнне (да кастрычніка 2023-га) складзе 115 рублёў (+15,6%)”, — адзначылі ў ведамстве.
З 1 жніўня павялічыўся памер даплат пенсіянерам ва ўзросце 75–79 гадоў — 81,19 рубля, 80 гадоў і старэй (з улікам надбаўкі на догляд) — 162,38, а пры наяўнасці інваліднасці I групы — 216,5.
Даплаты да пенсій атрымліваюць больш як 527 тыс. чалавек ва ўзросце 75 гадоў і старэйшыя. Выдаткі на гэтыя патрэбы складуць, па адзнацы ведамства, 790 млн рублёў.
Зацверджаны закон, які пазбаўляе пенсій сілавікоў, што пакінулі Беларусь
11 кастрычніка, Позірк. Закон з папраўкамі ў заканадаўства аб пенсіях для сілавікоў падпісаў Аляксандр Лукашэнка, вынікае з паведамлення яго прэс-службы. Сцвярджаецца, што змены закона "Аб пенсійным забеспячэнні ваеннаслужачых, асоб начальніцкага і шараговага складу органаў унутраных спраў, СК, Дзяржкамітэта судовых экспертыз, органаў і …