Затрыманы журналіст Ігар Ільяш — муж палітзняволенай Кацярыны Андрэевай (дапоўнена)

22 кастрычніка, Позірк. Затрыманы журналіст Ігар Ільяш — муж палітзняволенай журналісткі Кацярыны Андрэевай (Бахвалавай), паведамляе праваабарончы цэнтр “Вясна” са спасылкай на праўладныя рэсурсы.

Адзін са звязаных з сілавікамі тэлеграм-каналаў апублікаваў фота Ільяша, намякнуўшы, што яго затрыманне звязана з тэлеканалам “Белсат”. У наступным паведамленні з’явілася пагроза затрымаць знаёмых журналіста, якія нібыта паведамілі пра сітуацыю з ім незалежным СМІ.

Тэлеканал “Белсат” створаны для вяшчання на Беларусь у 2007 годзе на падставе дагавора паміж МЗС Польшчы і вяшчальнікам TVP. У лістападзе 2021 года беларускія ўлады прызналі тэлеканал “экстрэмісцкім фарміраваннем”. За супрацу з ім журналісты пераследуюцца ў крымінальным парадку.

Андрэева была затрыманая разам са сваім аператарам Дар’яй Чульцовай 15 лістапада 2020 года. Яна вяла жывы эфір з месца разгону сілавікамі людзей, што прыйшлі ўшанаваць памяць забітага актывіста Рамана Бандарэнкі (“плошча Перамен” — двор на вул. Чарвякова ў Мінску).

У лютым 2021 года суд Фрунзенскага раёна Мінска прызнаў журналістак вінаватымі ў “арганізацыі дзеянняў, якія груба парушаюць грамадскі парадак” (арт. 342 КК), і прыгаварыў да двух гадоў калоніі.

Беларускія праваабаронцы прызналі іх палітвязнямі.

13 ліпеня 2022 года Гомельскі абласны суд прыгаварыў Андрэеву да 8 гадоў калоніі паводле ч. 1 арт. 356 КК (здрада дзяржаве). Паколькі раней яна ўжо была прыгавораная да зняволення, шляхам частковага складання канчатковым пакараннем ёй прызначылі пазбаўленне волі на тэрмін 8 гадоў і 3 месяцы. Адлік вядзецца ад моманту затрымання ўвосень 2020 года.

20 верасня Вярхоўны суд не задаволіў скаргу Андрэевай на рашэнне Гомельскага абласнога суда і пакінуў гэты вырак у сіле. Разам з тым ВС адкарэктаваў фармулёўку абвінавачання — “выдача дзяржаўных сакрэтаў замежнай арганізацыі, замежнай дзяржаве” заменена на “шпіянаж”.

3 верасня таго ж года Чульцова выйшла на волю. Цяпер жыве ў Польшчы.