Ірына Леўшына: Пакідаць Беларусь не збіраюся
Ірына Леўшына і Дзмітрый Наважылаў
9 снежня, Позірк. Былы дырэктар і рэдактар інфармацыйнай кампаніі БелаПАН палітзняволеная Ірына Леўшына паведаміла на сваёй старонцы ў “Фэйсбуку”, што пасля вызвалення не збіраецца з’язджаць з краіны.
“7 снежня я шчасліва пакінула ПК-4, адбыўшы за кратамі 3 гады 3 месяцы і 3 тыдні. Паколькі я маю намер заставацца ў Беларусі, усякія каментары з майго боку, як вы разумееце, немагчымыя”, — напісала былая палітзняволеная.
Паводле слоў журналісткі, са здароўем і настроем “усё ў парадку”. “Прызвычаіваюся да свабоды, на шчасце быць побач з роднымі, да нармальнага жыцця. Дзякуй усім, хто хваляваўся за мяне ўвесь гэты час, я адчувала вашу падтрымку на адлегласці”, — падкрэсліла яна.
Леўшына цалкам адбыла тэрмін зняволення. Кіраўнік БелаПАН і яе папярэднік на пасадзе дырэктара Дзмітрый Наважылаў былі затрыманыя 18 жніўня 2021 года.
6 кастрычніка 2022 года Леўшына, Наважылаў, а таксама былы намеснік дырэктара БелаПАН Андрэй Аляксандраў і яго жонка Ірына Злобіна рашэннем Мінскага абласнога суда былі асуджаныя да розных тэрмінаў турэмнага зняволення. Леўшына атрымала 4 гады пазбаўлення волі па абвінавачванні ў стварэнні “экстрэмісцкага фарміравання”, якім улады палічылі частку супрацоўнікаў інфармацыйнай кампаніі БелаПАН, створанай у лістападзе 1991 года (ч. 1 арт. 3611 Крымінальнага кодэкса).
У апошнім слове перад вынясеннем прысуду Леўшына заявіла: “Рэдакцыю, у якой я прапрацавала амаль 30 гадоў, спрабуюць выставіць экстрэмісцкім фарміраваннем, А мяне — яго стваральнікам і кіраўніком. Гэта найпаўнейшае трызненне, але гэта не дзіўна. За апошнія паўтара года ў Беларусі знішчаныя дзясяткі сродкаў масавай інфармацыі, сотні журналістаў пазбавіліся працы або вымушаныя былі з’ехаць з краіны, баючыся крымінальнага пераследу. Зачысткі на інфармацыйным полі беспрэцэдэнтныя і неймаверныя для цывілізаванай дзяржавы ў XXI стагоддзі. Сёй-той відавочна пераблытаў прычынна‑выніковыя сувязі, вырашыўшы зрабіць журналістаў адказнымі за падзеі, якія адбыліся ў нашай краіне ў 20-м годзе. Вось толькі мы ні да чаго не заклікалі, мы нічога не скажалі і не выдумлялі — рэальнасць была круцейшая за любую выдумку”.
6 студзеня 2023 года Вярхоўны суд, які разглядаў апеляцыю Леўшынай, пакінуў прыгавор у сіле.
Галоўрэд БелаПАН адбывала тэрмін у гомельскай жаночай калоніі, працавала ў швейным цэху.
“Самае складанае для мяне тут — гэта адарванасць ад Мінска, — прызнавалася Леўшына ў адным з лістоў. — На ранейшым месцы мяне грэла думка пра тое, што зусім побач мой дом… Увогуле… выявілася, што геаграфія мае значэнне, нават калі знаходзішся ў ізаляцыі”.