Лукашэнка спрабуе стварыць уражанне, што Беларусь у баку ад вайны — цэнтр пры РНБА Украіны

27 студзеня, Позірк. Аляксандр Лукашэнка “спрабуе стварыць уражанне, быццам Беларусь стаіць у баку ад вайны”, так украінскі Цэнтр супрацьдзеяння дэзінфармацыі пры Радзе нацыянальнай бяспекі і абароны адрэагаваў на заяву “самаабвешчанага прэзідэнта” пра тое, што “беларускія міратворцы нібыта маглі б забяспечыць нармальныя ўзаемаадносіны паміж Украінай і Расіяй”.

“Актыўная падтрымка расійскага войска Беларуссю на пачатку поўнамаштабнага ўварвання ва Украіну зрабіла Мінск саўдзельнікам узброенай агрэсіі РФ супраць нашай дзяржавы. Таму любыя заявы пра “беларускіх міратворцаў” гучаць абсурдна, — канстатуе цэнтр. — “Міратворчая” рыторыка скіраваная на паляпшэнне іміджу Лукашэнкі ў вачах міжнароднай супольнасці. Таксама яго заява сугучная з хлусьнёй ru-прапаганды, што нібыта Захад і Украіна, а не Расія, прагнуць працягу вайны”.

На прэс-канферэнцыі 26 студзеня Лукашэнка, адказваючы на пытанне, ці не адчувае ён згрызот у сувязі з наданнем РФ беларускай тэрыторыі для нападу на Украіну ў 2022 годзе, заявіў, што ні пра што не шкадуе.

“Я не ваюю, у вайну не ўцягнуўся і сваю краіну не ўцягнуў. Але мы дапамагаем Расіі. І калі заходнікі мяне ў нечым папракаюць, я ім кажу: у вас 57 краін дапамагаюць Украіне, а я адзін, адна краіна, ну як магу. Ды якая там дапамога ўжо. <…> Што тычыцца майго ўварвання ва Украіну, украінцы ведаюць, што гэта не так”, — сказаў ён.

Пры гэтым Лукашэнка адзначыў, што войскі з Беларусі ва Украіну ўваходзілі праз чарнобыльскую зону: “Гэта былі войскі не беларускія, я адказваю за беларускія войскі”.