За суткі ліквідавана больш за 20 лясных пажараў

8 сакавіка, Позірк. З 6 гадзін 7 сакавіка да 6 гадзін 8 сакавіка ў Беларусі ліквідаваны 23 лясныя пажары на агульнай плошчы звыш 13 га, восем тарфяных (2,3 га) і 253 пажары травы і кустоў (126,8 га), вынікае з сутачнай зводкі МНС.

У Брэсцкай вобласці лясы гарэлі 11 разоў, Віцебскай і Мінскай — па адным, Гомельскай — сем, Магілёўскай — тры разы. Большасць узгаранняў ліквідавана сіламі Мінлясгаса без прыцягнення МНС.

“У сувязі з ростам колькасці загаранняў у прыродных экасістэмах Брагінскае, Ельскае, Лельчыцкае і Мазырскае звёны Гомельскай тэрытарыяльнай падсістэмы ДСНС, на падставе распараджэнняў адпаведных райвыканкамаў, пераведзены ў рэжым павышанай гатоўнасці функцыянавання”, — гаворыцца ў рэлізе.

Таксама са зводкі вынікае, што за суткі на пажары загінуў адзін чалавек — у дачным доме на тэрыторыі садовага таварыства каля в. Баравая Слабада Пухавіцкага р-на Мінскай вобласці.

Загінулы 1956 года нараджэння “пражываў у доме з дазволу гаспадара”, прычыны пажару і гібелі высвятляюцца.

Як паведамлялася, напярэдадні міністр па надзвычайных сітуацыях Вадзім Сіняўскі правёў аператыўную нараду “ў сувязі з абвастрэннем сітуацыі, звязанай з ростам пажараў у экасістэме”.

Паводле даных ведамства, “у параўнанні з аналагічным перыядам 2024 года назіраецца павелічэнне колькасці загаранняў у прыродных экасістэмах у 13,4 раза (з 54 да 726 выпадкаў)”, “плошча іх уздзеяння” павялічылася ў 64 разы (з 4,3 га да 276,1 га)”.

За папярэднія суткі адбыўся 31 лясны пажар, тры тарфяныя і 259 пажараў травы і кустоў.

Шэсць чалавек загінула на пажарах суткамі раней (у памяшканнях, пераважна жылых).