BySol абвясціў збор для былой палітзняволенай Антаніны Канавалавай

24 сакавіка, Позірк. Фонд салідарнасці BySol абвясціў збор сродкаў для былой палітзняволенай Антаніны Канавалавай.

Запытаная сума складае 6.700 еўра.

BySol адзначае, што ў зняволенні жанчына перанесла цяжкія ўмовы ўтрымання, якія моцна адбіліся на здароўі — “зрок пагоршыўся настолькі, што знаходзячыся ў калоніі атрымала інваліднасць”.

Адзначаецца, што экс-палітзняволеная мае патрэбу ў “базавых рэчах”, ёй неабходна набыць тэлефон і кампутар, каб можна было “вырашаць побытавыя пытанні, мець зносіны з лекарамі, знайсці працу і быць на сувязі з блізкімі”.

Канавалава была даверанай асобай Святланы Ціханоўскай на прэзідэнцкіх выбарах 2020 года, пакінула Беларусь у сакавіку.

Аб выхадзе 36-гадовай палітзняволенай на волю стала вядома 15 снежня 2024 года. Паводле звестак праваабарончага цэнтра “Вясна”, яна вызвалілася па памілаванні.

Пасля затрымання 6 верасня 2020 года Канавалава была прыгавораная да 5,5 года пазбаўлення волі паводле ч. 2 і ч. 3 арт. 293 Крымінальнага кодэкса (масавыя беспарадкі). Жанчыну абвінавачвалі ў адміністраванні тэлеграм-канала “Армія з народам” і ва ўдзеле ў руху Сяргея Ціханоўскага “Краіна для жыцця”.

Была ўнесеная ў спісы датычных да “экстрэмісцкай” і “тэрарыстычнай” дзейнасці.

Атрымала ў зняволенні інваліднасць трэцяй групы.

Па крымінальнай справе праходзіў таксама муж Канавалавай Сяргей Ярашэвіч. Паводле тых жа артыкулаў ён быў асуджаны таксама на 5,5 года зняволення. Пазней яго прыгаварылі яшчэ да дзевяці месяцаў пазбаўлення волі паводле арт. 411 КК (злоснае непадпарадкаванне патрабаванням адміністрацыі папраўчай установы).

У сямейнай пары двое малалетніх дзяцей. У апошнія гады яны пражываюць з бабуляй у вымушанай эміграцыі ў Польшчы.