Дэпутат-гісторык Даніловіч папракнуў “калектыўны Захад” у патуранні Гітлеру і абвінаваціў 28 еўрапейскіх народаў у нападзе на Беларусь

18 красавіка, Позірк. Вялікабрытанія і Францыя санкцыянавалі напад нацысцкай Германіі на СССР, заявіў намеснік старшыні пастаяннай камісіі па адукацыі, культуры і навуцы Палаты прадстаўнікоў Вячаслаў Данілавіч 17 красавіка ў Мінску на “Адзіным дні інфармавання”.

Мерапрыемства трансліравала агенцтва “Минск-новости”.

Парыж і Лондан, сказаў ён, “фармальна вайну Германіі аб’явілі” (гаворка ідзе пра пачатак Другой Сусветнай вайны 1 верасня 1939 года, — “Позірк”.), але пры гэтым “паабяцалі і запэўнілі Гітлера: “Ты ні пра што не думай і не турбуйся. Мы вайну аб’явім, але ваенных дзеянняў весці не будзем. Хочаш Польшчу – забірай Польшчу. Галоўнае, потым ідзі супраць Савецкага Саюза”.

“На так званым калектыўным Захадзе вельмі хочуць забыцца, што ў 1941 годзе разам з войскамі вермахта, разам з немцамі [на тэрыторыю Беларусі] прыйшлі 28 еўрапейскіх народаў — прадстаўнікоў, скажам так, у двукоссях, гэтых еўрапейскіх нацый — усталёўваць новы нацысцкі парадак на нашай зямлі“, — сцвярджае дэпутат.

Паводле яго, нацысцкая Германія “не сама па сабе з’явілася, набыла моц, каб пайсці на Усход”: “Яе ўзгадавалі, уз’еліілі так званыя вядучыя заходнія дэмакратыі, заходнія краіны — ЗША, Вялікабрытанія і Францыя”.

Гэтыя краіны, паводле Данілавіча, “уклалі вялізныя грошы ва ўздым германскай эканомікі, далі карт-бланш на міжнароднай арэне, аддалі на разарванне Германіі Чэхаславакію і Польшчу”.

Дэпутат сцвярджае, што гэта “заходнім дэмакратыям” неабходна было для таго, каб прыбраць з палітычнай арэны “гэтую ашалелую альтэрнатыву капіталістычнаму грамадству, якім кіравалі кіруючыя эліты Захаду”: “Такую альтэрнатыву прадстаўляў менавіта Савецкі Саюз”.

Гісторык лічыць, што ўрон ад акупацыі ў гады Другой сусветнай вайны для Беларусі складае каля 2,3 трлн. долараў і падтрымлівае ідэю патрабаваць у Берліна кампенсацыю.

51-гадовы Даніловіч — былы дырэктар Інстытута гісторыі НАН, экс-рэктар Акадэміі кіравання. Кандыдат гістарычных навук. Працягвае на паўстаўкі працаваць у Акадэміі навук.