Ад аплаты ўтылізацыйнага збору вызвалены новыя грузавікі, якія ўвозяцца ў Беларусь

18 красавіка, Позірк. Ад выплаты ўтылізацыйнага збору ў 2025 годзе вызвалены новыя (не старэйшыя за тры гады) грузавыя аўтамабілі экалагічнага класа “пяць” і вышэй, прычэпы і паўпрычэпы. Такое палажэнне вызначана ўказам Аляксандра Лукашэнкі ад 17 красавіка “Аб мерах па развіццю міжнародных аўтамабільных перавозак грузаў”, паведамляе яго прэс-служба.

Адзначаецца, што “прэферэнцыі дадуць магчымасць павялічыць экспарт транспартных паслуг і будуць садзейнічаць у цэлым развіццю экспартаарыентаванага сегмента эканомікі краіны”.

Дакумент накіраваны на “стварэнне дадатковых умоў для абнаўлення беларускімі аўтаперавозчыкамі парка транспартных сродкаў, канкурэнтаздольных на міжнародным рынку”.

28 студзеня стала вядома, што ўрад пералічыў стаўкі ўтылізацыйнага збору і зрабіў іх “выраўноўванне” са стаўкамі, якія дзейнічаюць у Расіі з 1 студзеня 2025 года.

Прадугледжаны пералік ставак утылізацыйнага збору, які выплачваецца як фізічнымі, так і юрыдычнымі асобамі на транспартныя сродкі і самаходныя машыны, якія вырабляюцца і ўвозяцца ў Беларусь, і (або) прычэпы да іх, за выключэннем выпадкаў, прадугледжаных міжнароднымі дагаворамі.

23 снежня мінулага года на нарадзе па пытаннях развіцця машынабудавання Лукашэнка паведаміў, што дамовіўся з РФ па пытанні ўтылізацыйнага збору, які абмяркоўваў на сустрэчы з Уладзімірам Пуціным у ліпені мінулага года.