15 траўня, Позірк. Швейцарыя 15 мая далучаецца да абмежавальных мер, прадугледжаных у 16-м пакеце санкцый Еўрапейскага саюза супраць Беларусі і Расіі, вынікае з паведамлення прэс-службы ўрада гэтай дзяржавы. Адпаведнае рашэнне Федэральная рада прыняла 14 траўня 2025 года.
Адзначаецца, што Федэральная рада пашырае санкцыі Швейцарыі супраць Беларусі, прынятыя ЕС 24 лютага 2025 года ў сувязі з працяглым удзелам Беларусі ў вайне РФ супраць Украіны. Меры ўключаюць, у прыватнасці, пастрожанне экспартных абмежаванняў і забарону на імпарт неапрацаванага беларускага алюмінію.
Меры скіраваныя на “далейшае ўзгадненне санкцый” супраць Беларусі з дзейнымі абмежавальнымі мерамі ў дачыненні да Расіі, у тым ліку для прадухілення іх абыходу.
Швейцарыя не з’яўляецца членам Еўрасаюза, але ўваходзіць у Еўрапейскую асацыяцыю свабоднага гандлю (ЕАСГ) і шчыльна звязаная з ЕС у палітычным і эканамічным плане.
19 сакавіка стала вядома, што Албанія, Боснія і Герцагавіна, Чарнагорыя, Паўночная Македонія і Украіна (краіны са статусам кандыдата на ўступленне ў ЕС), а таксама Ісландыя, Ліхтэнштэйн і Нарвегія (члены ЕАСГ) далучыліся да рашэння Савета Еўрапейскага саюза ад 24 лютага 2025 года (CFSP) 2025/3851 аб абмежавальных мерах у сувязі з сітуацыяй у Беларусі і яе ўдзелам у расійскай агрэсіі супраць Украіны.
Гэтыя ж краіны далучыліся да рашэння Савета Еўрапейскага саюза ад 27 сакавіка 2025 года (CFSP) 2025/6321 аб абмежавальных мерах у сувязі з сітуацыяй у Беларусі і ўдзелам краіны ў расійскай агрэсіі супраць Украіны.
