20 беларусаў, эвакуяваных з Ірана ў Азербайджан, паляцелі ў Мінск
17 чэрвеня, Позірк. Амбасада Беларусі ў Азербайджане сумесна з дыпламатычным прадстаўніцтвам у Іране арганізавала эвакуацыю 20 беларускіх і трох расійскіх грамадзян.
Паводле інфармацыі амбасады, ранкам 17 чэрвеня грамадзяне Беларусі рэйсам “Белавія” вылецелі з Баку ў Мінск.
Дыпламаты падзякавалі за дапамогу “дзяржаўным органам Азербайджана, а таксама старшыні Таварыства дружбы “Азербайджан — Беларусь” Васіфу Ісмаілаву і прадстаўніцтву “Белавія” ў Азербайджане”.
На фоне абвастрэння сітуацыі на Блізкім Усходзе Міністэрства замежных спраў Беларусі “настойліва рэкамендавала” суграмадзянам устрымацца ад наведвання Ізраіля і Ірана.
Ведамства, як адзначаецца, “працягвае пільна адсочваць сітуацыю і падтрымлівае сувязь з беларускімі грамадзянамі, якія знаходзяцца на тэрыторыях гэтых дзяржаў”.
Напярэдадні МЗС Беларусі нагадаў, што “ў Іране ажыццяўляецца збор інфармацыі і фармаванне спісаў грамадзян, якія звярнуліся па садзейнічанне”. Акрамя таго, “па адпаведных пытаннях падтрымліваюцца працоўныя кантакты з расійскім бокам”.
Раней міністэрства адзначала, што “ў Ізраілі ва ўмовах закрытай паветранай прасторы захоўваецца магчымасць выезду праз сухапутную мяжу з Егіптам і Іарданіяй”. Беларускім грамадзянам, якія хочуць пакінуць краіну, рэкамендавана выязджаць з Ізраіля праз пункт пропуску, які злучае горад Эйлат з егіпецкім горадам Таба (КПП Менахем Бегін — Таба).
З 13 чэрвеня Армія абароны Ізраілю (ЦАХАЛ) атакуе розныя цэлі на тэрыторыі Ірана, у асноўным вайсковыя і ядзерныя аб’екты, а таксама дзяржустановы. У выніку серыі кропкавых удараў ліквідаванае вышэйшае камандаванне Корпуса вартавых ісламскай рэвалюцыі, іранскай арміі і выведкі, забітыя дзевяць навукоўцаў-ядзершчыкаў.
Мэтай ізраільскай ваеннай аперацыі названая нанясенне крытычнай шкоды ядзернаму і ракетнаму патэнцыялу Ірана.
Іран адказвае масіраванымі ўдарамі з ужываннем балістычных ракет і беспілотных лятучых апаратаў.
