Сертыфікаты GMP маюць 43 з 52 беларускіх вытворцаў медыкаментаў — Мінздароўя

26 чэрвеня, Позірк. Сертыфікаты належнай вытворчай практыкі (GMP) маюць 43 з 52 беларускіх вытворцаў медыкаментаў, паведаміў намеснік міністра аховы здароўя Аляксандр Старавойтаў 26 чэрвеня на IV Еўразійскім эканамічным форуме ў Мінску.

Паводле яго слоў, якія прыводзіць прэс-служба Мінздароўя, большасць айчынных пляцовак па вытворчасці лекаў рэканструяваная і мадэрнізаваная — створаныя “новыя магутнасці, што адпавядаюць патрабаванням GMP”.

За студзень — травень 2025 года аб’ёмы продажаў фармацэўтычных вытворцаў у параўнанні з аналагічным леташнім перыядам “у натуральным выражэнні” павялічыліся на 8%, у вартасным — на 20%, паведаміў чыноўнік.

Каля 80% экспарту беларускай фармацэўтычнай прадукцыі прыпадае на краіны Еўразійскага эканамічнага саюза (ЕАЭС), што, паводле яго слоў, у грашовым эквіваленце складае больш за 150 млн долараў штогод.

“Цяпер на рынку ЕАЭС створаныя ўсе ўмовы для ажыццяўлення паставак на тэрыторыі дзяржаў — членаў ЕАЭС неабходных і запатрабаваных лекавых прэпаратаў, — сказаў Старавойтаў. — Дзяржавы — члены ЕАЭС застаюцца надзейнымі гандлёвымі партнёрамі, пашыраюць сваё ўзаемадзеянне і тым самым робяць значны ўнёсак у развіццё ўласнай фармгаліны”.

GMP — міжнародны стандарт, які вызначае патрабаванні да вытворчасці і кантролю якасці на фармацэўтычных, харчовых і іншых высокатэхналагічных прадпрыемствах. У Беларусі дзейнічаюць нацыянальныя правілы GMP, гарманізаваныя з міжнароднымі, якія прымяняюцца, у прыватнасці, пры вытворчасці лекавых сродкаў. Сертыфікат GMP пацвярджае, што вытворчасць адпавядае гэтым стандартам.