“Экстрэмісцкім фарміраваннем” прызнана ініцыятыва “Фемгрупа Беларусь”

10 кастрычніка, Позірк. “Экстрэмісцкім фармаваннем” прызнаў 7 кастрычніка ініцыятыву “Фемгрупа Беларусь” Камітэт дзяржаўнай бяспекі, вынікае з абноўленага іх спісу.

Дзейная за мяжой ініцыятыва была створаная, каб “жаночы рух працягваў уплываць на ўсе трансфармацыйныя працэсы ў новай Беларусі”, адзначаецца на яе старонцы ў “Фэйсбуку”.

Датычным да “фарміравання” названыя першая намесніца прадстаўніцы па сацыяльнай палітыцы Аб’яднанага пераходнага кабінета Юлія Міцкевіч, сацыёлаг Алена Агарэлышава і філосаф Вольга Шпарага.

Міцкевіч раней называлі датычнай да ініцыятывы “Актыўным быць файна”, прызнанай КДБ “экстрэмісцкім фармаваннем” 8 кастрычніка мінулага года.

Гэты жа статус КДБ прысвоіў 23 чэрвеня 2025 года гуманітарнай ініцыятыве “Офіс па адукацыі для новай Беларусі”, да якой сярод іншых аднёс Шпарагу (акадэмічнага дырэктара).

У спісе “экстрэмісцкіх фарміраванняў” цяпер 353 пазіцыі і 315 найменняў.