Праваабаронцы прызналі палітвязнямі яшчэ 11 чалавек

29 кастрычніка, Позірк. Беларуская праваабарончая супольнасць 29 кастрычніка прызнала палітычнымі вязнямі яшчэ 11 чалавек, вынікае з сумеснай заявы, апублікаванай на сайце цэнтра “Вясна“. Цяпер такі статус маюць 1.249 чалавек.

У спіс палітвязняў уключаныя змешчаныя пад варту і асуджаныя да пазбаўлення волі паводле арт. 361⁴ Крымінальнага кодэкса (садзейнічанне экстрэмісцкай дзейнасці) Валянцін Талкач, Андрэй Вусік, Сяргей Шкодзін, Фёдар Кандзіранда, Аляксандр Махнач, Ілона Гарбуновіч, Алег Пінчук, Аляксандр Маркін; паводле арт. 361² (фінансаванне экстрэмісцкай дзейнасці) — Дзмітрый Рожын.

Бізнесмен, былы ганаровы консул Беларусі ў Мексіцы Юрый Марозаў 29 кастрычніка асуджаны на 5 гадоў пазбаўлення волі паводле ч. 1 і 2 арт. 361⁴, а таксама паводле арт. 342 (актыўны ўдзел у дзеяннях, якія груба парушаюць грамадскі парадак).

Палітзняволенай прызнана таксама Галіна Лагуткоўская, у якой шэсць артыкулаў КК: 369 (абраза прадстаўніка ўлады), 368 (абраза прэзідэнта), 361¹ (стварэнне экстрэмісцкага фарміравання альбо ўдзел у ім), 367 (паклёп у дачыненні да прэзідэнта), 361⁴ і 369¹ (дыскрэдытацыя Рэспублікі Беларусь).

Праваабаронцы патрабуюць ад уладаў неадкладна вызваліць усіх палітвязняў і спыніць рэпрэсіі.

Адпаведную заяву падпісалі “Вясна“, Lawtrend, Respect-Protect-Fulfill, Беларускі Хельсінкскі камітэт, Беларускі ПЭН, “Прававая ініцыятыва”, Беларуская асацыяцыя журналістаў, Беларускі дом правоў чалавека імя Барыса Звозскава.