Мінск і Масква адказныя за дроны, якія ствараюць пагрозы на ўсходнім флангу ЕС — кіраўнік Еўракамісіі

20 траўня, Позірк. Расія і Беларусь “нясуць прамую адказнасць за дроны, якія ставяць пад пагрозу жыццё і бяспеку людзей на ўсходнім флангу Еўрапейскага саюза“, — напісала ў сацсетцы Х старшыня Еўрапейскай камісіі Урсула фон дэр Ляен.

“Еўропа адкажа адзінствам і сілай“, — дадала яна.

“Публічныя пагрозы Расіі ў адрас нашых краін Балтыі абсалютна непрымальныя. Хай ні ў каго не будзе сумненняў: пагроза адной дзяржаве-члену — гэта пагроза ўсяму нашаму саюзу”, — адзначыла фон дэр Ляен.

У Вільнюскай акрузе раніцай 20 траўня абвяшчалася паветраная трывога: у памежнай зоне Літвы быў зафіксаваны “неапазнаны лятаючы аб’ект з прыкметамі беспілотніка, які рухаўся з боку Беларусі“. Паветраная прастора над мясцовым аэрапортам была закрытая.

Аб магчымым беспілотніку, які ляціць у бок Літвы, паведаміў Вільнюсу Мінск. Пра гэта заявіў камандуючы сухапутнымі войскамі літоўскай арміі Нерыюс Станкявічус, адзначае LRT.

Меркаваны дрон быў зафіксаваны радарамі як Літвы, так і Латвіі, былі паднятыя сілы паветранай паліцыі НАТО, удакладніў ён. Два знішчальнікі ўзляцелі з авіябазы Эмары ў Эстоніі: адзін быў накіраваны ў бок Літвы, другі — Латвіі.

Аперацыя завяршылася тым, што “ў паветры не было выяўлена ніводнага варожага беспілотніка і самалёты вярнуліся ў Эстонію”.

Прадстаўнік арміі пакуль не можа сказаць, дзе знаходзіцца гэты лятальны апарат: пошукі працягваюцца з дапамогай верталёта ваенна-паветраных і наземных сіл.

19 траўня міністр нацыянальнай абароны Балтыйскай дзяржавы Робертас Каўнас заявіў, што Літва “не пацерпіць ніякіх парушэнняў сваёй паветранай прасторы ў мэтах правядзення вайсковых аперацый“. Паводле яго слоў, Крэмль стварае ілжывы наратыў, накіраваны на запалохванне суседніх краін; распаўсюджванне Крамлём дэзінфармацыі аб нібыта атрыманым Украінай дазволе на выкарыстанне паветранай прасторы краін Балтыі для арганізацыі аперацый з беспілотнікамі супраць РФ “з’яўляецца адным з метадаў запалохвання“.

Напярэдадні Служба знешняй выведкі РФ заявіла, што Кіеў нібыта рыхтуе ўдары па Расіі з тэрыторыі Латвіі і прыстрашыла Рыгу “справядлівай адплатай“.

Кіраўнік МЗС Латвіі Байба Бражэ назвала заяву СЗВ “чарговай хлуснёй Расіі”.

19 траўня аб рэальнасці паўторнага наступу расійскіх войскаў з тэрыторыі Беларусі заявіў галоўнакамандуючы ўзброенымі сіламі Украіны Аляксандр Сырскі. “У нас ёсць звесткі, што расійскі Генштаб цяпер актыўна пралічвае і плануе аперацыі наступальных дзеянняў з поўначы“, — сказаў ён.

15 траўня прэзідэнт Украіны Уладзімір Зяленскі паводле вынікаў нарады з кіраўніцтвам структур сіл абароны паведаміў, што ўкраінская выведка фіксуе спробы “пераканаць [Лукашэнку] далучыцца да новых расійскіх агрэсіўных аперацый“; стала вядома аб планах аперацый “па кірунках на поўдзень і на поўнач ад тэрыторыі Беларусі — альбо супраць Чарнігаўска-Кіеўскага кірунку ва Украіне, альбо супраць адной з краін НАТО“.

Міністэрства абароны Беларусі 18 траўня паведаміла пра пачатак трэніроўкі вайсковых частак баявога ўжывання ядзернай зброі і ядзернага забеспячэння. Было заяўлена, што вучэнні праводзяцца ў “інтарэсах павышэння гатоўнасці Узброеных сіл да ўжывання сучасных сродкаў паражэння, у тым ліку спецыяльных боепрыпасаў“.

19 траўня Мінабароны РФ абвясціла аб пачатку трохдзённых вучэнняў, у рамках якіх сярод іншага будуць адпрацоўвацца “пытанні сумеснай падрыхтоўкі і прымянення ядзернай зброі, размешчанай на тэрыторыі Рэспублікі Беларусь“.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Напад пачаўся ў тым ліку з беларускай тэрыторыі.