Актывы банкаў Беларусі, якія падвяргаюцца крэдытнай рызыцы, павялічыліся за год амаль на 10%

2 чэрвеня, Позірк. Прыбытак банкаў, якія працуюць у Беларусі, на 1 траўня 2026 года склаў 1 млрд 448,1 млн рублёў — на 26,9% больш, чым на аналагічную дату 2025-га (1 млрд 141,1 млн), сведчыць праведзены “Позіркам” аналіз звестак Нацыянальнага банка.

Нарматыўны капітал на пачатак траўня складаў 25 млрд 19,2 млн рублёў (+11,4%); схільныя да крэдытнай рызыкі актывы — 126 млрд 646,9 млн (+9,8%), неабслугоўваныя актывы — 2 млрд 759,1 млн (-22,1%).

На 1 траўня 2026 года ў Беларусі быў зарэгістраваны 21 банк (тры з іх — са 100-працэнтным замежным удзелам). Іх статутны капітал — 12 млрд 180,2 млн рублёў (+20,6% у гадавым вымярэнні).

Нацбанк знізіў на чэрвень 2026 года значэнні разліковых велічынь стандартнай рызыкі. Такім чынам, РВСР (апошні раз змяняліся з 1 красавіка) наступныя:

для новых тэрміновых безадзыўных банкаўскіх укладаў (дэпазітаў) фізічных асоб у рублях з тэрмінам вяртання ад аднаго да трох гадоў — 13,55% гадавых (было — 14,14%, зніжэнне на 0,59 працэнтнага пункта);

для новых тэрміновых безадзыўных банкаўскіх укладаў (дэпазітаў) фізічных асоб у рублях з тэрмінам вяртання больш за тры гады — 14,91% гадавых (15,31%; -0,4 п.п.);

для новых крэдытаў, прадастаўленых фізічным асобам (за выключэннем ільготных), — 17,96% (18,26%; -0,3 п.п.);

для новых крэдытаў, прадастаўленых юрыдычным асобам (за выключэннем ільготных, інвестыцыйных), — 12,26% (12,8%; -0,54 п.п.);

для новых інвестыцыйных крэдытаў, прадастаўленых юрыдычным асобам (за выключэннем ільготных), — 11,22% (11,8%; -0,58 п.п.).

З 1 чэрвеня па рашэнні Нацбанка стаўка рэфінансавання зніжана з 9,75% да 9,25%. Стаўка па крэдыце овернайт — з 11,25% да 10,75% гадавых.