3 чэрвеня, Позірк. Аб спагнанні з жыхара Шальчынінкскага раёна шкоды па грамадзянскім пазове кампаніі “Літоўскія аэрапорты” паведаміла 3 чэрвеня Служба аховы дзяржаўнай мяжы Літвы (САДМ).
Суд разглядаў пазоў аб прыпыненні працы вільнюскага аэрапорта ў ноч на 22 кастрычніка 2025 года.
Адзначаецца, што гэта першы такі выпадак.
Як паведамляе пагранслужба, у згаданую ноч супрацоўнікі САДМ правяралі інфармацыю аб “незаконнай дастаўцы падакцызных тавараў з Беларусі з дапамогай паветраных шароў”. У рамках мерапрыемстваў, якія праводзіліся, быў затрыманы аўтамабіль “Фальксваген Пасат” з літоўскімі нумарамі, за рулём якога знаходзіўся 33-гадовы мужчына.
“На месцы здарэння памежнікі выявілі рэшткі паветранага шара і дастаўлены ім з Беларусі груз кантрабанды. Да 1.500 пачкаў цыгарэт “NZ Gold“ з беларускімі акцызнымі маркамі былі прымацаваныя дзве GPS-прылады для адсочвання грузу падчас палёту“, — гаворыцца ў паведамленні.
У дачыненні да мужчыны была ўзбуджаная крымінальная справа, якой разглядаў Вільнюскі рэгіянальны ўчастковы суд.
На судовым пасяджэнні абвінавачаны паведаміў, што пазнаёміўся з грамадзянінам Беларусі, які прапанаваў яму зарабіць на перавозцы цыгарэт, якія дастаўляюцца па паветры. “Менавіта ад гэтага беларуса ён у тую ноч атрымаў праз месенджар каардынаты месца пасадкі грузу. Па гэтых каардынатах мужчына знайшоў кантрабанду і збіраўся яе вывезці, аднак быў затрыманы памежнікамі“, — паведамляе САДМ.
Суд устанавіў, што жыхар Шальчынінкскага раёна “дзейнічаў у складзе арганізаванай злачыннай групы сумесна з неўстаноўленымі асобамі, якія знаходзіліся падчас расследавання на тэрыторыі Беларусі“.
Прыгавор па справе быў вынесены 1 чэрвеня 2026 года.
Фігурант прызнаны вінаватым у кантрабандзе і “незаконным абыходжанні з падакцызнымі таварамі”. Пры гэтым прызначанае пакаранне было аб’яднанае з раней накладзеным на яго ў 2021 годзе і да гэтага часу не выплачаным штрафам у памеры 12.300 еўра за аналагічнае злачынства.
У выніку канчатковы памер штрафу склаў 20.000 еўра.
У рамках пазову кампаніі “Літоўскія аэрапорты“ на мужчыну накладзена спагнанне ў памеры 22.108 еўра ў кошт кампенсацыі шкоды, а таксама “5% гадавых на гэтую суму з моманту ўступлення прысуду ў законную сілу да поўнага пакрыцця шкоды”, адзначае памежнае ведамства.
Падкрэсліваецца, што праз кантрабанду цыгарэт па паветры ў тую ноч у вільнюскім аэрапорце быў прыпынены рух паветраных судоў: адменена 25 рэйсаў, 9 рэйсаў перанакіравана ў іншыя аэрапорты, яшчэ 20 рэйсаў затрымана. Наступствы закранулі 6.992 пасажыраў.
Акрамя гэтага, суд “ужыў да асуджанага меру крымінальна-прававога ўздзеяння ў выглядзе канфіскацыі маёмасці і спагнаў з яго кошт аўтамабіля ў памеры 880 еўра“. Адзначаецца, што аўтамабіль “Фольксваген Пасат“, на якім ён прыехаў па кантрабанду, быў пазычаны ў знаёмага.
Уварванне шароў з кантрабанднымі цыгарэтамі з Беларусі ў Літву ўвосень і ў пачатку снежня 2025 года стала прычынай неаднаразовага закрыцця вільнюскага аэрапорта, размешчанага недалёка ад мяжы. 9 аналагічных выпадкаў зафіксавана ў 2026 годзе.
Што тычыцца апісанага выпадку, пасля яго Літва ўпершыню прыпыніла на некалькі гадзін уезд транспартных сродкаў з Беларусі.
У той жа дзень, 22 кастрычніка, прэм’ер-міністр балтыйскай краіны Інга Ругінене заявіла, што ў выпадку яшчэ аднаго масавага залёту на тэрыторыю Літвы паветраных шароў з кантрабандай мяжа з Беларуссю будзе закрытая. Гэты крок быў рэалізаваны літоўскім бокам з 29 кастрычніка па 19 лістапада.
Усяго 22 кастрычніка ў Літве было выяўлена восем кантрабандных шароў. Паведамлялася пра затрыманне аднаго чалавека.
