У Мінску затрыманыя двое замежнікаў: 18-гадовы закладчык наркотыкаў і ўладальнік фальшывага пашпарта, які спрабаваў вылецець у Баку

17 чэрвеня, Позірк. Пра затрыманне 18-гадовага замежніка, які прыехаў у Беларусь “для працы закладчыкам”, паведаміла ГУУС Мінскага гарвыканкама.

Адзначаецца, што малады чалавек “знайшоў падпрацоўку сацыяльную сетку“, ён “разумеў, што ўдзельнічае ў незаконным абароце наркотыкаў“.

“Па прыездзе ў Мінск ён забраў па каардынатах майстар-скарб і расклаў разавыя дозы наркотыкаў па схованках для спажыўцоў. Пры гэтым сам іншаземец забароненыя рэчывы не ўжываў”, — гаворыцца ў паведамленні.

Пры ім і ў схованках выяўлена не менш за 75 грамаў альфа-ПВП, распачатая крымінальная справа за незаконны абарот наркотыкаў.

Дзяржпагранкамітэт 17 чэрвеня паведаміў аб затрыманні ў нацыянальным аэрапорце Мінск замежнага грамадзяніна, які спрабаваў вылецець у Баку (Азербайджан) па замежным расійскім пашпарце. Гэта адбылося 13 чэрвеня, заяўляецца, што памежны нарад выявіў “прыкметы падробкі дакумента“.

Адзначаецца, што пазней “спецыяльная праверка дакументаў пацвердзіла поўную падробку”.

“Парушальнік знаходзіцца ў ізалятары часовага ўтрымання ГУУС Мінгарвыканкама. За спробу незаконнага перасячэння мяжы яму пагражае штраф да 100 базавых велічынь. Акрамя таго, за выкарыстанне падробленага дакумента прадугледжана крымінальная адказнасць — да 2 гадоў абмежавання волі“, — паведамілі ў пагранведамстве.