31-гадовы мужчына затрыманы брэсцкай мытняй за спробу ўвозу какаіну

21 чэрвеня, Позірк. Аб затрыманні ў пункце пропуску Брэст (з польскага боку — Цярэспаль) 31-гадовага пасажыра рэйсавага аўтобуса паведамляе Дзяржаўны мытны камітэт (ДМК).

Прычынай затрымання стала “спроба ўвозу ў Беларусь какаіну”.

“Ідучы па зялёным калідоры, беларус заявіў аб адсутнасці тавараў, якія падлягаюць абавязковаму дэклараванню, забароненых альбо абмежаваных да перамяшчэння праз мяжу”, — адзначае ДМК.

Звяртаецца ўвага, што ў зале мытнага афармлення “гэтую інфармацыю службовы сабака не пацвердзіў, дакладна паказаўшы паводзінамі на наяўнасць у мужчыны забароненых рэчываў”.

“Пры даглядзе яго валізкі знойдзены лекавы флакон, у якім знаходзіўся скрутак з парашкападобным рэчывам белага колеру”, — паведамляе ведамства.

Экспертыза паказала, што канфіскаванае рэчыва змяшчае 0,69 г “небяспечнага наркатычнага сродку — какаіну”.

У дачыненні да мужчыны ўзбуджаная крымінальная справа паводле ч. 2 арт. 3281 КК (незаконнае перамяшчэнне праз мытную мяжу ЕАЭС і (або) дзяржмяжу Беларусі наркатычных сродкаў, псіхатропных рэчываў альбо іх прэкурсораў або аналагаў), фігуранту пагражае да 10 гадоў пазбаўлення волі.

Гл. таксама:

За тыдзень мытня спыніла сама меней тры спробы ўвозу ў Беларусь з Літвы наркотыкаў