Польшча вышле дваіх беларусаў, якія на расійскія грошы вербавалі ўкраінцаў для ўдзелу ў дэманстрацыях

29 чэрвеня, Позірк. Дзевяць грамадзян Украіны і двое грамадзян Беларусі затрыманыя і маюць быць высланыя з польскай тэрыторыі за вярбоўку і аплату ўдзелу людзей у дэманстрацыях, арганізаваных сярод украінскіх уцекачоў у Польшчы, паведамляе выданне Rzeczpospolitа са спасылкай на міністра-каардынатара спецыяльных службаў Томаша Сямоняка.

Як паведаміў чыноўнік на сваёй старонцы ў сацыяльнай сетцы Х, украінцаў і беларусаў затрымалі супрацоўнікі Агенцтва ўнутранай бяспекі (ABW) сумесна з Памежнай аховай.

“Паводле звестак Агенцтва ўнутранай бяспекі, ініцыятыва і фінансаванне гэтай дзейнасці зыходзілі з Расіі і могуць быць кваліфікаваныя як спроба правядзення аперацыі ўплыву на ўкраінскіх мігрантаў у Польшчы”, — адзначыў міністр.

Паводле інфармацыі ABW, затрыманні праведзеныя ў Варшаве, Вроцлаве, Кракаве, Закапанэ і Быдгашчы. Быў выяўлены “механізм выкарыстання ўкраінскіх уцекачоў у Польшчы для дзейнасці, інспіраванай і фінансаванай Расіяй”.

“Згодна са звесткамі ABW, затрыманыя асобы падтрымлівалі сувязі з Расіяй і Беларуссю. З восені 2025 года яны займаліся вярбоўкай удзельнікаў дэманстрацый, што праводзіліся сярод украінскіх уцекачоў, якія знаходзяцца ў Польшчы, а таксама аплачвалі іх удзел. Удзельнікі пратэстаў атрымлівалі грашовую ўзнагароду, а сродкі на гэтыя мэты, паводле інфармацыі ABW, паступалі з Расійскай Федэрацыі”, — паведаміла ведамства.

Заяўляецца, што мэтай арганізатараў было “паступовае ўчыненне ўплыву на ўкраінскую супольнасць уцекачоў у Польшчы і выкарыстанне гэтай групы для прасоўвання палітычных лозунгаў”.

Для ініцыявання пратэстаў выкарыстоўваліся тэмы, якія выклікаюць моцны грамадскі рэзананс, напрыклад, паведамленні пра карупцыйныя скандалы і актуальныя падзеях ва ўнутранай палітыцы Украіны.

“Гэта прыклад дзейнасці, якая ажыццяўляецца ніжэй парога класічнай агрэсіі, мэта якой — падрыў грамадскага даверу, распальванне сацыяльнай напружанасці і выкарыстанне людзей, якія ратуюцца ад вайны, у якасці інструмента расійскай аперацыі ўплыву”, — заявіла ABW.

У апублікаванай 6 траўня справаздачы Агенцтва ўнутранай бяспекі Польшчы гаварылася, што 2024–2025 гады ў гэтай краіне характарызаваліся “падвышанай і нарастальнай актыўнасцю перш за ўсё расійскіх спецслужбаў, беларускіх, якія шчыльна з імі супрацоўнічаюць, а таксама кітайскіх”.

ABW нагадала пра затрыманне ў траўні 2024 года грамадзяніна Польшчы Каміла К., а таксама двух грамадзян Беларусі — Сцяпана К. і Андрэя Б., якія здзяйснялі падпалы па заданні спецслужбаў Расіі; у лістападзе таго ж года — грамадзяніна Беларусі Яраслава С., які падазраваўся ў спробе падпалу аб’екта ў Гданьску.