За гвалт у дачыненні да міліцыянера жыхар Гомеля асуджаны да 2,5 года пазбаўлення волі

7 ліпеня, Позірк. Суд Навабеліцкага раёна Гомеля прысудзіў мясцовага жыхара да 2,5 года пазбаўлення волі, паведамляе УУС Гомельскага аблвыканкама.

Мужчына прызнаны вінаватым паводле арт. 364 Крымінальнага кодэкса (гвалт альбо пагроза прымянення гвалту ў дачыненні да супрацоўніка органаў унутраных спраў). Таксама фігурант абавязаны выплаціць супрацоўніку МУС кампенсацыю маральнай шкоды ў памеры 300 рублёў.

“Два сябры выпівалі каля дома на вуліцы Жамчужнай. Жыхары патэлефанавалі ў міліцыю, і на месца выехаў нарад. Мужчын, якія ўжо былі ладна п’яныя, затрымалі”, — паведамляе УУС.

Адзначаецца, што пры пасадцы ў службовы аўтамабіль адзін з затрыманых “паспрабаваў ударыць міліцыянера нагой, але той адрэагаваў і ўхіліўся”. “Тады абвінавачаны перайшоў да лаянкі. А ўжо на ганку Навабеліцкага РАУС, куды яго даставілі, ён зрабіў падножку супрацоўніку міліцыі, праз якую той упаў і пашкодзіў калена”, — гаворыцца ў паведамленні.

Адзначаецца, што спачатку мужчына быў арыштаваны на восем сутак за “знаходжанне ў грамадскім месцы ў стане ап’янення, а таксама абразы ў адрас міліцыянераў”, яго таксама аштрафавалі на 20 базавых велічынь (900 рублёў).

Пасля гэтага была распачатая крымінальная справа.