35-гадовы пешаход загінуў у ДТЗ у Дзяржынскім раёне

7 ліпеня, Позірк. Пра смяротнае дарожна-транспартнае здарэнне ў Дзяржынскім раёне паведамляе Дзяржаўтаінспекцыя Мінскай вобласці.

ДТЗ адбылося 6 ліпеня каля 23:26 на 322-м км аўтадарогі М-1 Брэст — Мінск — мяжа РФ.

“56-гадовы кіроўца, жыхар Брэсцкай вобласці, кіруючы аўтамабілем Renault у счэпцы з паўпрычэпам Schmitz, здзейсніў наезд на 35-гадовага жыхара Любанскага раёна, які, паводле папярэдняй інфармацыі, рухаўся ў спадарожным кірунку”, — гаворыцца ў паведамленні.

Пешаход ад атрыманых цялесных пашкоджанняў памёр на месцы здарэння.

Адзначаецца, што загінулы не быў абазначаны святловяртаючымі элементамі.

Па факце ДТЗ праводзіцца праверка.

Колькасць дарожна-транспартных здарэнняў знізілася ў Беларусі за год на 5,5% (з 3.453 у 2024-м да 3.262 у 2025-м), вынікае з праведзенага “Позіркам” аналізу даных Нацыянальнага статыстычнага камітэта. Колькасць загінулых у ДТЗ скарацілася на 1,8% (з 434 да 426), траўмаваных — на 8,4% (з 3.804 да 3.483).