Фінальныя выпрабаванні другога блока БелАЭС прайшлі паспяхова — кіраўнік “Расатама”

16 кастрычніка, Позірк. Фінальныя 15-дзённыя выпрабаванні другога энергаблока Беларускай АЭС прайшлі паспяхова, вынікае з заявы генеральнага дырэктара расійскай дзяржкарпарацыі “Расатам” Аляксея Ліхачова.

16 кастрычніка ў Мінску кіраўнік “Расатама” сустрэўся з прэм’ер-міністрам Беларусі Раманам Галоўчанкам.

“У вельмі шчыльным узаемадзеянні з Мінэнерга пад кантролем МНС, Дзяржатамнагляду праведзены ўвесь неабходны комплекс выпрабаванняў, уключаючы апрабаванне комплекснае, — заявіў Ліхачоў (на падставе відэафрагмента з тэлеграм-канала ўрада). — Мы падыходзілі роўна з такімі ж жорсткімі патрабаваннямі па бяспецы, як падыходзім да працы сваіх станцый. Мы атрымалі пачуццё задавальнення, што самы хвалюючы этап <…> прайшоў у нашым разуменні паспяхова. Але галоўны экзаменатар — замоўца, таму чакаем вашае рашэнне”.

Паводле яго слоў, “Расатам” не спыняе супрацоўніцтва з Беларуссю. Ён запэўніў, што дзяржкарпарацыя будзе ставіцца да БелАЭС “як да сваёй у частцы эксплуатацыі, забеспячэння палівам”. Акрамя таго, беларускаму боку будуць прапаноўвацца “новыя тэхналагічныя рашэнні, звязаныя з паліўным цыклам, адпрацаваным ядзерным палівам”.

Беларуская АЭС узводзіцца паблізу Астраўца (Гродзенская вобласць) пераважна за кошт крэдыту Расіі паводле расійскага праекта ВВЭР-1200. Генеральным праекціроўшчыкам і генпадрадчыкам выступае інжынірынгавая кампанія “АСЭ”, якая з’яўляецца галаўной арганізацыяй інжынірынгавага дывізіёна “Расатама”.

Першы блок сілкуе энергасістэму з 3 лістапада 2020 года (прамыслова эксплуатуецца з чэрвеня 2021-га). 6 кастрычніка 2023-га на аб’екце пачаўся чарговы планава-папераджальны рамонт. На перыяд яго правядзення блок адлучаны ад сеткі.

Другі энергаблок працуе ў рэжыме доследна-прамысловай эксплуатацыі, вырабляе электраэнергію з 13 траўня гэтага года.

Цяпер, пасля завяршэння 15-дзённых выпрабаванняў, якія праходзілі з 29 верасня, спецкамісія павінна зацвердзіць акт аб прыёме аб’екта ў эксплуатацыю. На гэтым збудаванне АЭС будзе лічыцца завершаным.