Цягам тыдня звольнена два топ-кіраўнікі, якія адказвалі за працу БелАЭС
Міхаіл Філімонаў
4 студзеня, Позірк. Цягам тыдня вызвалены ад пасадаў два топ-кіраўнікі, якія адказвалі за працу Беларускай атамнай электрастанцыі.
4 студзеня Аляксандр Лукашэнка прызначыў генеральным дырэктарам станцыі 51-гадовага ўраджэнца Гомеля Сяргея Бабовіча. З 10 жніўня 2020 года ён працаваў намеснікам генеральнага дырэктара дзяржаўнага вытворчага аб’яднання “Белэнерга”.
Раней, з першых дзён рэалізацыі праекта, БелАЭС кіраваў Міхаіл Філімонаў. У 1980 годзе ён скончыў Беларускі політэхнічны інстытут, з тых часоў працаваў у сферы энергетыкі.
29 снежня рашэннем урада быў адпраўлены ў адстаўку намеснік міністра энергетыкі 68-гадовы Міхаіл Міхадзюк, які непасрэдна курыраваў працу БелАЭС.
На пасадзе намесніка кіраўніка Мінэнерга Міхадзюк працаваў з 2005 года.
Будоўля БелАЭС паблізу Астраўца (Гродзенская вобласць) завяршылася восенню 2023 года. Станцыя пабудавана па расійскім праекце, генеральным падрадчыкам выступіла дзяржаўная карпарацыя “Расатам”.
Першы энергаблок АЭС сілкуе энергасістэму Беларусі з 3 лістапада 2020 года, другі — з 13 траўня гэтага года. У прамысловую эксплуатацыю яны ўведзены ў чэрвені 2021-га і лістападзе 2023-га адпаведна.
Аляксандр Лукашэнка неаднаразова казаў пра магчымасць будоўлі ў Беларусі яшчэ адной АЭС.
Гл. таксама:
Мінэнерга абвяргае інфармацыю агенцтва “Блумберг” аб няштатнай сітуацыі на БелАЭС у 2022 годзе
Першы блок БелАЭС уключаны ў сетку пасля планава-папераджальнага рамонту