Прэм’ер Польшчы: Загарода на мяжы з Беларуссю будзе мадэрнізавана ў самыя кароткія тэрміны
16 лютага, Позірк. Загарода на беларуска-польскай мяжы павінна быць мадэрнізаваная “ў самыя кароткія тэрміны”, заявіў прэм’ер-міністр Польшчы Дональд Туск па выніках перамоваў з кіраўніком урада Фінляндыі Петэры Орпа.
Паводле слоў Туска, якія перадае Rzeczpospolita, рашэнне аб мадэрнізацыі загароды прынята ім сумесна з міністрам унутраных спраў і адміністрацыі Марцінам Кервінскім, на гэта будзе выдзелена “адэкватнае фінансаванне”.
Польскі прэм’ер таксама заклікаў да рэфармавання заканадаўства ЕС у частцы прадастаўлення прытулку замежнікам, выказаўшы меркаванне, што яно “неадэкватна ўзроўню пагроз, якія ўяўляюць сабой палітыка Расіі і Беларусі”.
16 студзеня паведамлялася, што ў 2024 годзе на абслугоўванне фізічных і электронных бар’ераў на мяжы з Беларуссю Польшча выдзеліць каля 2,5 млн злотых (прыкладна 625 тыс. долараў), гарантыйны тэрмін іх эксплуатацыі складае пяць гадоў.
Удакладнялася, што за кошт сродкаў ЕС таксама будзе пабудаваны электронны бар’ер на водным участку мяжы (172 км па рацэ Буг і 47 км па рацэ Істачанка).
Туск на прэс-канферэнцыі 3 студзеня заявіў, што Польшча “зробіць усё, каб ахова межаў была эфектыўнай і жорсткай, калі гэта неабходна” і абвясціў пра намер у бліжэйшы час наведаць усходнюю мяжу.
22 снежня 2023 года Кервінскі адзначыў, што загарода на польска-беларускай мяжы “не забяспечвае поўную бяспеку”, таму яе будуць паляпшаць “для павышэння эфектыўнасці”.
Польшча завяршыла ўзвядзенне 206-кіламетровага плота ўздоўж мяжы з Беларуссю ў чэрвені 2023 года. Збудаванне фізічнага бар’ера стала рэакцыяй Варшавы на рэгулярныя з вясны 2021 года патокі нелегальных мігрантаў, якія імкнуцца трапіць у краіны ЕС з беларускай тэрыторыі.
Беларускія ўлады неаднаразова крытыкавалі Польшчу за гэтае рашэнне нібыта з меркаванняў абароны прыроды.
Варшава вынесла пытанне аб далейшым лёсе бар’ера на мяжы з Беларуссю на арганізаваны разам з парламенцкімі выбарамі ў кастрычніку 2023 года рэферэндум, але ён не адбыўся з-за недастатковай яўкі.
У 2023 годзе ў Польшчы прадухілена 25.571 спроба незаконнага перасячэння мяжы з боку Беларусі, у 2022-м — 15.655, з пачатку года — 180.