У Мінску судзяць журналіста Карнея

19 сакавіка, Позірк. У Мінскім гарадскім судзе 19 сакавіка разглядаецца справа журналіста Ігара Карнея.

Згодна з раскладам на партале электроннага судаводства, суддзя Сяргей Кацар пачаў працэс у 10:00. Паводле даных праекта “Грамадзянскі кантроль судовай сістэмы”, з 2020 года ён вынес каля 170 рашэнняў па адміністрацыйных і каля 30 прыгавораў па крымінальных справах паводле артыкулаў, якія часцей за ўсё сведчаць пра палітычны характары пераследу.

Карней абвінавачаны паводле ч. 3 арт. 361¹ КК (уваходжанне асобы ў склад экстрэмісцкага фарміравання ў мэтах здзяйснення злачынства экстрэмісцкай накіраванасці — удзел у экстрэмісцкім фарміраванні). Санкцыі па гэтай частцы артыкула — да 4 гадоў абмежавання волі або пазбаўленне волі на тэрмін ад 2 да 6 гадоў.

Мужчыну затрымалі 17 ліпеня 2023 года, у яго доме прайшоў вобшук. Карнея арыштавалі на 10 сутак нібыта за падпіску на “экстрэмісцкія” рэсурсы, але ў святле ўзбуджэння крымінальнай справы на волю ён так і не выйшаў.

Доўгі час Карней супрацоўнічаў з незалежнымі медыя.