Мінулым днём у Польшчу з беларускай тэрыторыі спрабавала прабрацца рэкордная колькасць нелегалаў

22 сакавіка, Позірк. У мінулыя суткі, 21 сакавіка, зафіксавана рэкордная з пачатку міграцыйнага крызісу колькасць нелегалаў, якія спрабавалі пранікнуць у Польшчу з беларускай тэрыторыі, — 298. Пра гэта сведчыць праведзены “Позіркам” аналіз звестак памежнай службы суседняй краіны.

Папярэдні рэкорд быў зафіксаваны 27 ліпеня 2023 года — 292 мігранты. 20 сакавіка ў Польшчу спрабаваў трапіць 201 нелегал.

Агулам 21 сакавіка сумежныя краіны ЕС спынілі 316 спробаў (рэкорд з пачатку года) незаконнага перасячэння мяжы (Польшча — 298, Латвія — 18, Літва — ніводнай), днём раней — 226 (201, 23, 2).

З пачатку года краіны ЕС папярэдзілі 3.067 спробаў парушэння мяжы з боку Беларусі (Польшча — 2.331, Латвія — 602, Літва — 134), у тым ліку ў сакавіку — 2.513 (1.888, 522, 103).

Колькасць мігрантаў, якія спрабавалі нелегальна перасекчы мяжу з пачатку сакавіка, у 4,5 разы перавысіла сумарны паказчык студзеня і лютага (554) (мяжу з Польшчай — у 4,3 раза, з Латвіяй — у 6,5 раза, з Літвой — у 3,3 раза).

У 2023 годзе было папярэджана 42.078 спроб незаконнага перасячэння мяжы з боку Беларусі (Польшча — 25.571, Латвія — 13.863, Літва — 2.644), у 2022-м — 31.892 (Польшча — 15.655, Латвія — 5.026, Літва — 11.211). Агульны рост склаў 31,9% (на польскім напрамку — у 1,6 разы, латвійскім — у 2,8 раза; на літоўскім зафіксавана зніжэнне ў 4,2 раза).

Міграцыйны крызіс на мяжы Беларусі і краін ЕС працягваецца з вясны 2021 года.