Амбасадары краін ЕС у Славакіі адмовіліся ўдзельнічаць у цырымоніі, на якую запрасілі дыпламатаў з Беларусі і РФ
Мемарыяльны комплекс Славін у Браціславе
4 красавіка, Позірк. Запрашэнне амбасадараў Беларусі і Расіі стала прычынай таго, што кіраўнікі дыпламатычных прадстаўніцтваў краін Еўрасаюза адмовіліся ўдзельнічаць у цырымоніі ўскладання вянкоў з нагоды 79-й гадавіны вызвалення Браціславы, вынікае са слоў прэм’ер-міністра Славакіі Роберта Фіцы.
Цырымонія павінна прайсці 4 красавіка ў мемарыяльным комплексе Славін, які быў адкрыты ў славацкай сталіцы 3 красавіка 1960 года. Напярэдадні акцыі Фіца апублікаваў на сваёй старонцы ў “Фэйсбуку” відэазварот, у якім назваў абуральнай адмову еўрапейскіх дыпламатаў ад прысутнасці на цырымоніі “толькі таму, што чакаецца ўдзел амбасадараў Расіі і Беларусі”.
Паводле яго слоў, гэта праява непавагі да “6.845 ваяроў Чырвонай Арміі, якія не змаглі вярнуцца дадому з Браціславы пасля яе вызвалення”. Фіца лічыць, што ўскладанне вянкоў — гэта меншае, што можна зрабіць “у памяць пра пакуты, прычыненыя фашызмам”.
Летась 30 верасня ў Славакіі прайшлі пазачарговыя парламенцкія выбары, на якіх перамагла левацэнтрысцкая партыя “Кірунак — сацыяльная дэмакратыя” на чале з Робертам Фіцам (некаторыя медыя называюць яго лабістам інтарэсаў РФ). Ён чацвёрты раз узначаліў урад краіны. Да гэтага Фіца кіраваў кабінетам у 2006–2010, 2012–2016 і 2016–2018 гадах.
Пасля прыходу да ўлады новых сіл Славакія дэкларуе прарасійскую (і адпаведна прамінскую) пазіцыю, аднак толькі на ўзроўні рыторыкі. 1 лютага Браціслава прагаласавала за выдзяленне Еўрасаюзам Украіне 50 млрд еўра на працягу 2024–2027 гадоў.
Пасля пачатку вайны РФ супраць Украіны і ролі рэжыму Аляксандра Лукашэнкі ў гэтай агрэсіі, беларускіх і расійскіх дыпламатаў адмовіліся запрашаць на шэраг знакавых мерапрыемстваў. Японія адмовіла ім ва ўдзеле ў цырымоніі памяці ахвяр атамных бамбардаванняў Хірасімы і Нагасакі, Нобелеўскі камітэт адклікаў запрашэнне на ўручэнне прэміі.
Не запрашалі дэлегацыі Беларусі і РФ на цырымоніі да гадавіны вызвалення нацысцкіх канцлагераў Бухенвальд і Мітэльбау-Дора (Германія), Маўтхаўзен (Аўстрыя), Асвенцым (Польшча).
