Хрэнін назваў “мудрай і абачлівай” паветраную атаку Ірана на Ізраіль

28 красавіка, Позірк. Пра гатоўнасць Беларусі “развіваць і ўмацоўваць” супрацоўніцтва з Іранам ва ўмовах міжнародных санкцый заявіў міністр абароны Віктар Хрэнін на сустрэчы з калегам Махамадам Ашціяні.

Сустрэча прайшла 27 красавіка ў Астане (Казахстан) у рамках нарады міністраў абароны краін Шанхайскай арганізацыі супрацоўніцтва (ШАС), паведамляе іранскае агенцтва Tasnim.

Адзначаецца, што Хрэнін асудзіў авіяўдар Ізраіля па консульстве Ірана ў Дамаску, які прывёў да гібелі членаў Корпуса вартавых ісламскай рэвалюцыі (КВІР) і “высока ацаніў аперацыю ў адказ” Тэгерана ў ноч на 14 красавіка.

Іранскую паветраную атаку Ізраіля Хрэнін, як паведамляецца, назваў “мудрай і абачлівай”.

Ашціяні ў сваю чаргу заявіў, што Іран і Беларусь “падзяляюць погляды па асноўных рэгіянальных і міжнародных праблемах і заўсёды падтрымлівалі пазіцыі адзін аднаго”. Ён падкрэсліў “высокі патэнцыял” дзвюх краін “у вайсковым і абаронным сектарах”, адзначыўшы “гатоўнасць Тэгерана да больш цеснага супрацоўніцтва з Мінскам”.

Познім вечарам 13 красавіка Іран нанёс авіяўдар па Ізраілю. Атака працягвалася пяць гадзін. Усяго, як паведаміла Армія абароны Ізраіля (ЦАХАЛ), было выпушчана 120 балістычных і 30 крылатых ракет, а таксама больш за 170 беспілотнікаў.

Паводле слоў прадстаўніка ЦАХАЛ Даніэля Хагары, сістэма супрацьпаветранай абароны Ізраіля пры садзейнічанні ЗША, Іарданіі і іншых краін, перахапіла “99% паветраных пагроз”, ізраільскай тэрыторыі дасягнулі “толькі некалькі” з іх.

Прадстаўніцтва Ірана ў ААН заявіла, што іранская атака на Ізраіль завершаная. “Справу можна лічыць скончанай. Але калі Ізраільскі рэжым зробіць яшчэ адну памылку, адказ Ірана будзе значна больш суровым”, — гаварылася ў паведамленні прадстаўніцтва ў сацсетцы X.

1 красавіка ізраільская авіяцыя нанесла ўдар па консульстве Ірана ў Дамаску. Загінулі сямёра членаў КВІР, уключаючы двух генералаў. У Іране заявілі, што “сіянісцкі рэжым будзе пакараны”.

14 красавіка “глыбокую занепакоенасць” у сувязі з авіяўдарам Ірана выказала МЗС Беларусі. Пры гэтым ведамства ў сваім паведамленні не згадала пра факт паветранай атакі, а заявіла пра “эскалацыю сітуацыі ў блізкаўсходнім рэгіёне”.

У той жа дзень дэмакратычны лідар Святлана Ціханоўская “рашуча асудзіла” паветраны ўдар Ірана па Ізраілю.

“Маё сэрца з народам Ізраіля, якому цяпер пагражаюць тыя ж дроны, якія Расія выкарыстоўвае супраць Украіны, — напісала палітык на сваёй старонцы ў сацсетцы X. — Аўтарытарныя рэжымы аб’ядноўваюцца ў вось зла. Толькі дзякуючы адзінству і салідарнасці дэмакратычны свет можа спыніць гэты наступ на свабоду”.

Напружаная сітуацыя на Блізкім Усходзе захоўваецца з 7 кастрычніка 2023 года, калі на тэрыторыю Ізраіля з сектара Газа ўварваліся баевікі ваеннага крыла групоўкі ХАМАС. Адначасова з Газы пачаўся інтэнсіўны абстрэл ізраільскай тэрыторыі, было выпушчана больш за 10 тыс. ракет. У выніку загінула каля 1,4 тыс. чалавек з 37 краін, у тым ліку трое грамадзян Беларусі; пацярпела 7,3 тыс. чалавек.

У адказ Ізраіль пачаў наземную ваенную аперацыю супраць сектара Газа з мэтай вызвалення захопленых закладнікаў і знішчэння групоўкі ХАМАС.