Беларускія спартсмены атрымалі 20 ліцэнзій на ўдзел у Алімпіядзе — БФСС
3 траўня, Позірк. Айчынныя спартсмены атрымалі 20 ліцэнзій для ўдзелу ў Алімпійскіх гульнях, якія пройдуць у Парыжы 26 ліпеня — 11 жніўня 2024 года, паведаміў Беларускі фонд спартыўнай салідарнасці (БФСС).
6 з 20 ліцэнзій атрымана ў вольнай барацьбе, іх заваявалі Арыян Цютрын, Магамед Кадымагамедаў, Аляксандр Гуштын, Дзяніс Храмянкоў, Ірына Курачкіна і Ванэса Каладзінская.
У спаборніцтвах па цяжкай атлетыцы выступяць Сюзана Валадзько, Яўген Ціханцоў і Эдуард Зязюлін; па плаванні — Ілля Шымановіч, Анастасія Шкурдай і Аліна Змушка; па скачках на батуце — Іван Літвіновіч і Віялета Бардзілоўская; па акадэмічным веславанні — Яўген Залаты і Таццяна Клімовіч; па грэка-рымскай барацьбе — Абубакар Хаслаханаў; па кулявой стральбе — Уладзіслаў Дземеш; па тхэквандо — Георгій Гурцыеў.
Адна неіменная ліцэнзія атрыманая ў веласпорце.
БФСС адзначае, што 10 чэрвеня пройдзе кваліфікацыя ў тэнісе.
19 сакавіка дырэктар дэпартамента Міжнароднага алімпійскага камітэта (МАК) па сувязях з нацыянальнымі алімпійскімі камітэтамі Джэймс Маклеад паведаміў, што да ўдзелу ў Алімпіядзе дапушчана 7 беларускіх спартсменаў. Тады ж ён адзначыў, што прагназуе павелічэнне іх колькасці да 22, а максімальная колькасць можа скласці 28, але гэта “малаверагодна”.
Маклеад таксама паведаміў, што спартсмены абедзвюх краін не змогуць прыняць удзел у цырымоніі адкрыцця Алімпійскіх гульняў, але “ім будзе прадастаўленая магчымасць перажыць гэтую падзею [у якасці гледачоў]”. “Гэта той жа сцэнар, які выкарыстоўваўся для незалежных удзельнікаў Алімпійскіх гульняў у Барселоне 1992 года з былой Югаславіі”, — сказаў прадстаўнік МАК.
Вынікі беларусаў і расіян, дадаў ён, не будуць адлюстроўвацца ў агульным медальным заліку Алімпіяды.
У выпадку перамогі прадстаўнікоў дзвюх краін у Парыжы будзе узняты зацверджаны МАК для такіх выпадкаў сцяг у суправаджэнні спецыяльнага гімна (без слоў), падкрэсліў алімпійскі чыноўнік.
28 лютага 2022 года, праз некалькі дзён пасля пачатку вайны ва Украіне, МАК заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынятая да выканання, у выніку чаго расійскі і беларускі спорт апынуўся амаль у поўнай ізаляцыі.
25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ніводнаму спартсмену нельга забараняць удзельнічаць у спаборніцтвах “толькі праз яго пашпарт”.
28 сакавіка МАК выпусціў заяву, у якой рэкамендаваў міжнародным федэрацыям у відах спорту дазволіць беларусам і расіянам удзельнічаць у міжнародных спаборніцтвах. Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання сцяга, гімна і іншай сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзеючых кантрактаў з сілавымі і ваеннымі ведамствамі сваіх краін.
8 снежня 2023 года МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях 2024 года ў Парыжы ў нейтральным статусе. З прычыны блізкасці летняй Алімпіяды шэраг адпаведных федэрацый дапусціў беларусаў і расіян да спаборніцтваў пад сваёй эгідай.